無線新劇《法證先鋒II 》女主角佘詩曼
第一集撕爛裙玩濕身，性感出擊成功錄得首週35點收視。為更上一層樓，上週三（五月廿八日），大班《法》劇演員出席「精英水上至激鬥」活動，不論小生花旦個個水著現身，橋唔怕舊，繼續賣肉換收視。
大會規定泳裝上陣，連當日生日嘅佘詩曼亦無得避免，雖然三點式外面加多件T 恤，但露腰加熱褲晒腿都夠養眼；反而「麵嫂」蒙嘉慧以一件頭短裙包到實一實，偶然
低身露骨隙，搶鏡比率點講都係偏低。
不過講到尾，男主角歐陽震華（Bobby ）冇嚟，觀眾無緣飽覽佢嘅大肚腩加三角泳褲水著look ，唔通監製想留番佢做秘密武器？
密實三點式
講過會著三點式宣傳嘅佘詩曼，當日著住黑底白色波點泳衣現身，雖然外面加件T 恤，不過小腰精一出再加雪白長腿，養眼！
臨尾香
當日33歲生日嘅阿佘，獲監製梅小青送上蛋糕賀壽，吹蠟燭，佘波初露，全日力保走光卻臨尾香。
排骨隙
「長平公主」蒙嘉慧，以連身短裙上陣唔敢獻醜。以為包到上頸唔會走光，點知好心遞毛巾俾楊秀惠，乍現排骨隙，嚇人多於性感。
有料唔怕晒
向來屬有料之人嘅楊思琦，普通兩件頭平腳泳衣，大好身材遮都遮唔住，尤其
低身玩遊戲，C 級咪咪呼之欲出。
盲妹落水
當日跌咗副隱形眼鏡嘅楊秀惠，擺甫士影相叉錯腳跌落水，慘變落湯雞，唯有傻笑遮醜。
班男演員毫無同情心，見楊秀惠一上水，成班夾手夾腳再推佢落泳池，唯一憐香惜玉嘅高鈞賢，想出手英雄救美，點知被人踢埋落去鴛鴦戲水。
縮得快
生得最神高神大嘅黎諾懿，學契姐蒙嘉慧玩密實，更加唔肯落水，閃去佘詩曼身後避難，繼而驚到衝入廁所，唔通佢都有唔方便嘅日子？
壯男晒胸
女嘅晒身材，高鈞賢、袁偉豪等，個個都唔蝕底除衫晒胸肌，仲自願輪流炸水，搞到成班記者連相機都濕埋。
