我唔打假波！真實對白
擁33C 、23、33美好身段嘅胡琳，在34度炎夏，終忍唔住要落水浸一浸，一件頭泳衣都包唔住佢嘅C cup 身段。
女將角力，唔比較點會有話題
！
出道時以唱爵士歌，一把騷靈聲的胡琳，最近竟然要同泳兒挑戰。唔講唔知，兩人同屬06年新人，亦同樣俾人話把聲似天后王菲，眼見同期泳兒忽然行性感，胡琳又話要做sexy 舞后。
新人獎輸畀泳兒，但2年來積極練功，近日為參演舞台劇《綠野仙蹤》跑步練氣，又游水做到足，上週在沙灘大曬33C 真材實料。28歲胡琳追打泳兒話：「泳兒跳舞係勁度十足，但佢少少O 字腳！」
胡琳雖然只得5呎3吋高，但勝在身材均勻，最緊要對腳夠直嘛！
曬咪不忘睇書，喺NY 生活咗10年嘅胡琳，在沙灘咪緊《The Best Things to Do in NEW YORK 》，講紐約生活嘅美好事物，例如cafe ，例如點放鬆自己！New Yorker 必睇呀！
廣東出世，18歲去了美國浸鹹水的胡琳（Bianca ），曾於紐約參加歌唱比賽奪冠，06年正式踩入樂壇，至今出過4隻碟，以往唱開爵士歌，有口碑但冇乜市場，加上自己本身好身材，穿起sexy 舞衣跳舞絕不輸蝕，所以改行舞后路線。
貼身舞
新歌〈一個人〉，胡琳棄Jazz 變舞后，著住熱褲同男dancer 有身體接觸，擺明sell 身材。
對手大鬥法
泳兒早排保良騷勁騷豐咪，但胡琳就直指佢O 字腳跳舞蝕底，似踩非踩，高招呀！
跳得辛苦
現年28歲的胡琳，曾於美國學拉丁舞，「過時學得好開心，因為老師讚我對腳夠直，比例ok ，好適合跳舞」。
對於同屬06年新人的泳兒，近日亦谷胸跳舞，胡琳認為泳兒已經盡力，「我都有睇佢過日（保良騷）嘅表現，佢跳得好有力、好放，（可惜有啲O 字腳喎！）佢少少O 字腳啦，當年老師有話過O 字腳嘅人如果要跳得靚，要練多啲，同埋辛苦啲。」唔多覺「帝帝貢」，胡琳精叻發功。
今年轉型唱快歌，做舞台劇，實行瓣瓣掂，唔怪得要跑步游水練氣啦！
06年胡琳一口氣出咗3張唱片，新人之中都算勁。第一隻《LOVE NOTES 》口碑唔差㗎！
唔打假波
細細粒胡琳，與賣靚聲的泳兒雖屬同屆新人，但如今泳兒已在樂壇有一席位，月前保良騷曬胸更引來焦點，胡琳卻仍然靠邊站。「今年我會參與舞台劇，又會出新碟，改唱快歌，我相信今年應該會有更多人認識到我係邊個！谷胸？我唔會刻意咁做，更加接受唔到打假波！」
同以實力靚聲闖樂壇的胡琳和泳兒，去年頭爭完新人獎，今年胡琳再發功，多元化發展又唱又跳，連舞台劇都撈埋，33C 真材實料更唔怕曬，睇嚟泳兒都要飲多兩碗木瓜湯，打定底好喎！
左：泳兒（Vincy ）
原名：陳家欣
26歲
160cm
88磅
《2005年英皇新秀歌唱比賽》亞軍和最佳型格獎，後簽約英皇娛樂。
右：原名：胡琳
（Bianca ）
28歲
160cm
90磅
在紐約參加LMC Music 舉行的歌唱比賽獲得冠軍後並獲簽約。
貴鞋私伙
拍MV 當日，屋企大把嘅胡琳自備私伙，名牌鞋都帶5、6對，乜唔係襯好至拎出嚟㗎咩？
家中自拍
屋企啲鞋多到著唔曬，對對都要幾千蚊落樓，胡琳嗱嚟圍住自己加隻貓。唔怪得每年要過百萬置裝啦！
有米爵士女變舞后
胡琳是家中獨女，胡爸在大陸搞電子廠，所以今年28歲嘅胡琳，除咗歌手身份，原來只撈過一份part-time 。「我喺美國做過幾日指甲美容嘅part-time ，後來要簽唱片公司，所以冇做咋！」
屋企有米，06年胡琳試過自資近10萬開mini concert ，自住豪宅區大坑的胡琳，每季都會花約30萬置裝，一年閒閒哋都百二萬，你話有個有錢爸爸幾好呢！
