娛頭:私人小島野戰 阿嬌泰國夾實Juno鍾欣桐（阿嬌）自捲入淫照風暴後，事業及形象全部插水，原本諗住第一個企出嚟勇敢面對公眾搏翻身，一樣於事無補。
不過，事業失意的阿嬌愛情路上卻如魚得水，冧掂十億太子爺麥浚龍（Juno ），雙方唔單只不避嫌勁騷情侶鑽戒，Juno 還公開用六個好字形容阿嬌，二人親密關係迅即浮上面！
一心諗住收山嫁入豪門的阿嬌，本月八日人在泰國，與拍擋阿Sa （蔡卓妍）及英皇集團老闆楊受成夫婦求見白龍王，之後再會合Juno ，在泰國私人小島過二人世界。
本週二（三月十八日）廿四歲生日的Juno ，日前已在blog 上放了兩張自拍的陽光與海灘相，生日當天更在blog 上用英文宣示愛的宣言留言，「給我愛的人，在戰場上我們並肩作戰，讓我知道自己並唔係一個人在戰鬥。」
Juno 公開示愛，阿嬌今次定過抬油！
3月8日
本月8日阿嬌與阿Sa 及老闆楊受成秘密到泰國求見白龍王，祈求消災解難，不過白龍王卻批她事業難有起色。
在本週二（18日）24歲生日的Juno ，凌晨時分在blog 中寫了一段愛的宣言，表示會跟阿嬌並肩作戰，冧爆。
Juno 在blog 上大晒幸福，將跟阿嬌慶祝生日的小島景色拍下，與fans 一齊分享。
求白龍王打救
淫照風暴令阿嬌純情形象破產，廣告商全面喊停，停產冇收入，她唯有低於巿價急放三個西半山豪宅套現止血，並計劃到外國進修，無限期停工。為了避開傳媒日夜追訪，有報導指阿嬌於上週二（十一日）由香港飛到日本避難，暫別香港。
事實上，阿嬌早於本月八日前已秘密飛到泰國，並聯同阿Sa 及老闆楊受成到白龍王廟求對方指點迷津。
據當日在現場的信眾指，阿嬌一行人約在早上九時現身白龍王廟，等待參拜的信眾一見阿嬌現身，即時一陣騷動及嘩然；在她身旁的彪形大漢還向各人事先聲明不准拍照，不過仍有人伺機用手機拍下整個過程。
愛得痴纏
阿嬌被廣告商、歌迷嫌棄，但Juno 就當係寶，唔理家人反對都要愛到底，每收到阿嬌送的禮物，以及與她之間的點滴，Juno 都會透過網誌（blog ）狂晒。
11/2 阿嬌出席記者會發表「天真論」，被發現手上戴有Jacob &Co.Eternity Band 系列戒指，而Juno 為雜誌拍封面照時，亦戴上該品牌Wedding Band 系列的戒指，情侶關係曝光。
14/2 情人節，一向冇公開情人的Juno 更新網誌，自爆收到情人所送的卡地亞火機：「很喜歡那蓋子打開時所發出的聲音，實在相當動聽，感謝！」
29/2 Juno 更新網誌，大晒自己再收定情信物，今次是Maison Martin Margiela （MMM ）銀包：「其實近日一直找新銀包更換，很感謝。」睇得出阿嬌絕對知Juno 心意。
15/3 Juno 被指請三星期假陪阿嬌歐遊散心，但實情則去了泰國度假，還把小島海灘的照片，上載到網誌：「很感謝你及你家人的關照，令我十分享受，這裡是天堂，努力工作努力玩樂。」
阿嬌凶多吉少
當日楊受成先上前參拜白龍王，白龍王在他耳邊簡單說了幾句話，然後才到阿嬌上前，不過除了一般加持、灌頂、蓋印等儀式外，白龍王還剪了阿嬌一小撮頭髮，然後裝在一個透明的小袋子中，嘴裡唸唸有詞，據知剪頭髮唸經是消災解厄的儀式。
之後，阿嬌由身旁的彪形大漢陪住帶到另一個房，然後再輪到阿Sa 上前見白龍王。當英皇一行人參拜完後，楊受成再上前與白龍王傾多陣，待一眾人離開後，白龍王休息時，對其他七嘴八舌的信眾說：「呢次老闆唔會有事，歌手會有事。」似暗示阿嬌事業凍過水。
阿Sa 被阿嬌的淫照事件拖累，搞到要收車馬費賤價接show ，難怪每次出席活動都呻一個人難撐，更暗示Twins 可能拆夥。
泰國二人世界
見完白龍王後，楊受成似乎未能解開心結，上星期六（三月十五日）黃昏七點幾，現身中環英皇鐘錶店，一身白衫白褲的楊受成，一直皺住眉頭，全無歡容。
英皇眾人回港工作，但阿嬌卻選擇繼續留在泰國，原來是為了會合男友Juno 。焗住放長假的阿嬌早已計劃好與Juno 到外地散心，以人盯人戰術夾緊對方，而Juno 為討女友歡心，上週突然向唱片公司請假十日，並向外聲稱要到美國及日本學跳舞，實則是陪阿嬌過二人世界。
「之前Juno 老豆下咗旨，講到明唔准阿嬌入門，不過Juno 對呢段感情好認真，加上阿嬌又狂發SMS 冧佢，仲話要陪佢二人世界過生日，Juno 咪即刻同公司請假囉。」知情者透露。
Juno 同阿嬌連日不避嫌公開狂晒情侶戒指，令親密關係曝光。
網上日誌晒恩愛
據知，二人上週先在泰國的私人小島玩幾日，享受陽光與海灘浪漫假期，然後再飛日本及美國，巡迴過生日。日前，Juno 更以「In Paradise 」為題，在網誌中將度假時所影的藍天白雲、海灘相放上blog 同網友分享。
放相晒恩愛之餘，Juno 在本週二（三月十八日）生日當天，更以「My 24th 」為題公開愛的宣言：「給我愛的人，在戰場上我們並肩作戰，讓我知道自己並唔係一個人在戰鬥。」阿嬌今次二人世界浪漫生日遊，明顯非常成功。
義氣當飯食
阿嬌極速冧掂十億太子爺Juno ，諗住收山嫁入豪門，但好姊妹阿Sa 就無咁好福氣，被阿嬌連累而身價暴跌，還要獨力面對傳媒，搞到心力交瘁。
21/2 阿Sa 單拖出席英皇春茗，講起阿嬌就鼓埋泡腮：「人生總有好多路要行，將來嘅路會好崎嶇，但人生係咁，要繼續行，努力振作，經一事長一智，作為好姊妹，我會支持佢，唔會放棄佢！」
23/2 有網民發起惡搞阿嬌行動，阿嬌缺席「全城起哄08迎馬術」活動，由阿Sa 頂上，阿Sa 否認阿嬌壓力大要睇心理醫生：「佢始終都係人，有情感，呢段時間響佢身邊俾最大鼓勵佢，總之工作上我會配合佢。」
29/2 阿嬌難得蒲頭，同阿Sa 到深圳出席晚會做表演嘉賓，為了保住僅有的飯碗，即使被男高層狼吻耳背面頰，都冇聲出。
3/3 阿Sa 出席I.T.產品頒獎禮，獲頒大獎時，談及最近經常單拖面對傳媒，感覺乏力：「每日返到屋企都好攰，好似打完仗咁，好頭痛，仲要答咁多問題！」
9/3 阿Sa 出席東亞運動會揭幕禮時，談及被男高層狼吻，阿Sa 嬲爆：「嗰個人飲到好醉，我手揸住支咪真係想扑佢，佢喔一聲錫埋嚟，全場都聽到好尷尬。」
11/3 阿Sa 出席中港澳共十一個電台合辦的音樂頒獎禮，連奪三獎的她不單只唔開心，更感到前路茫茫，暗示Twins 有可能拆夥：「音樂上第一次單拖，好唔慣，冇阿嬌冇安全感，前面嘅路唔知點，我同公司同阿嬌搵緊一個舒服嘅方法去做。」
謝霆鋒話栢芝丟架
淫照風暴後，傳出婚變消息，以及被指受奶奶狄波拉杯葛的張栢芝一直匿埋唔肯見人，謝霆鋒更避得就避。不過，本週二（三月十八日）霆鋒出席電影《風雲II 》記者會，首度開腔談及淫照事件，對太太張栢芝成為淫照女主角，他聲言一開始知道對方（栢芝）係咩人，更話丟架的事唔值得講足三個月。
選擇性失聰
剪了新髮型的謝霆鋒接受訪問時口口聲聲話同栢芝感情好，一齊打機、睇戲，更否認老婆有咗，仲話同家人感情好咗。不過，當講起栢芝做咗淫照女主角，他就冇再為對方講好說話：「第一日娶老婆都知娶咗咩人，佢亦都知道佢嫁嘅係咩人，以前嘅嘢都過去咗。」
霆鋒更無厘頭將奧運年同淫照事件相提並論，且兩度強調淫照事件十分丟架。
「我哋要為奧運年感到好驕傲，話俾人聽黃皮膚嘅人幾叻，唔係咁丟架！咁丟架嘅事唔值得再提，你睇外國娛樂圈發展得咁成功，就係佢哋唔似香港人咁踩番香港人，大家要錫住香港人，我講嘅唔係單指自己同老婆，只係呢件事唔值得講三個月，對娛樂圈心淡！」
至於一直為鋒芝做代言人的狄波拉（拉姑），在上週五（三月十四日）接受訪問時自爆頂唔住，連月來要睇心理醫生，更叫傳媒放過佢。拉姑有事，做仔的霆鋒竟然冇聽聞，識得選擇性失聰，都係好事！
阿嬌飛泰國前，先到柴灣工業城的studio 拍電影海報，完成手頭上最後工作，她就會無限期停工，同Juno 歎世界。
白龍王話「歌手有事，老闆冇事」，不過楊受成都好勤力，經常到中環巡鋪。
