陳法拉去年憑住一股姣勁極速上位，接騷接到手軟，試過短短一個月袋五十萬，成為電視台新紮姐仔中最賺錢的一個。
為此，連女主角都未做到的陳法拉自以為是，以為可以同屬一線的廖碧兒、胡杏兒看齊，接騷開天殺價，普通商場騷由去年兩萬幾級跳至六萬，泳衣騷更索價八萬，比專業紅模熊黛林六萬泳衣騷仲要貴。廣告商即縮，退而求其次，用肯搏肯露的徐淑敏、楊秀惠及葉翠翠頂上，陳法拉隨時偷雞唔到蝕揸米！
遲到犯眾憎
由於陳法拉攃住搶加上態度唔憂做，令唔少廣告商反感，於是紛紛打退堂鼓，反向平一半有多的徐淑敏及楊秀惠埋手。「Suki 、楊秀惠同葉翠翠收得平又一樣肯性感，就算一次用兩個嘅價錢加埋都唔使陳法拉咁多，廣告商梗識計數。」是以過去數月，陳法拉幾乎絕跡商場騷。
無得撈，陳法拉依然唔知驚，近日拍攝《溏心風暴之家好月圓》繼續扮大牌，經常遲到。劇組人員說：「佢離晒譜，無論幾點鐘通告都好，都一定會遲成個鐘，搞到全廠人等佢。」
連第一女主角之位都未上到，陳法拉便犯齊遲到扮大牌兩大娛圈死罪，再咁落去，真係「前途無限」！
除笨有精
陳法拉獅子開大口，令徐淑敏、楊秀惠、葉翠翠、李亞男和陸詩韻等無線姐仔有機會執死雞，接騷接到手軟，商場騷平均價約二萬多，即使要三點式上陣，都只係四萬左右，點都抵用過陳法拉。
六萬變百萬
陳法拉○五年當選華姐後，雖然密密有劇拍，但由於兩年冇劇出街，人氣欠奉；直到去年《溏心風暴》，加上同陳豪、黃宗澤等自製緋聞，成功在姐仔中排眾而出，成為新一代姣精！
由於《溏》劇熱爆，加上陳法拉又肯性感示人，天時地利，廣告加商場騷，財源滾滾，試過一個月接廿四個騷，極速賺五十萬。
受到廣告界歡迎，陳法拉已即時加價一倍，商場價由兩萬加至四萬，雖然收費急升，但人氣高企的她依然有市場，繼續密密接。眼見加價後依然大把人搵，在劇集穩坐第二女主角的陳法拉即扮晒一線阿姐，向廣告商開出天價。
「佢（法拉）同人講自己拍得住廖碧兒、胡杏兒，所以騷價唔應該收少過佢哋，上年張玉珊搵佢再拍修身堂廣告，佢獅子開大口收一百萬要同『黎明嫂』樂基兒同價，人哋當初搵佢拍都係俾六萬蚊，唔夠一年就幾何級數咁升，完全無諗過當初人哋俾機會佢，咁忘本，張玉珊嗰邊嬲到震，講明唔再用佢！」知情者透露。
近半年已無乜商場騷做的陳法拉，一姐價令廣告商卻步，寧願轉搵平靚正的徐淑敏及葉翠翠。
陳法拉因工作態度差得罪監製，在《溏心風暴之家好月圓》中再次淪為大配角，被徐子珊及葉翠翠踩住上。
陳法拉去年在台慶頒獎禮上揮抵勁敵廖碧兒，奪得「最佳女配角」，得獎後的她氣焰十足，拍劇時遲到兼態度囂張。
