卅四歲的楊千嬅去年十月在紅館舉行演唱會，有「情場老千」之稱的丁子高場場現身高調將姊弟戀擺上枱。雖然女方身邊好友齊聲叫唔好，但多年冇拖拍的千嬅當耳邊風，即使明知對方死充兼記錄不良，仍誓死都要一齊！
今年七月才滿廿九歲，出名花心的丁子高搵到金礦，但本性難移，千嬅為箍實男友，竟行奶奶政策，老嫩都殺！
求愛敢死隊
Ｏ一年同鄭中基分手後，楊千嬅感情生活近乎零，雖然分別同吳彥祖、古天樂傳緋聞，但全部一瞬即逝，直至去年十月，楊千嬅在舉行演唱會前被傳媒撞破與丁子高「同車」關係，「姊弟戀」正式曝光！
以為搵到個筍盤，點知丁子高是情場老千，唔單止充有錢仔溝女，更有鋪「
完唱」癮，不過，心口掛個「勇」字的楊千嬅唔理咁多，繼續開行turbo 。
「本來千嬅諗住公開戀情都無所謂，但佢估唔到男友會俾人彈到一文不值，唯有公開同丁子高劃清界線，死口唔認拍拖，但另一方面，佢又驚唔公開正印身份，阻止唔到其他女仔埋男友身，所以都好矛盾。」知情者說。
扮唔識丁母
今年一月，楊千嬅被傳媒拍到夜晚到丁子高屋企打邊爐，還做埋阿四幫男友揼骨，自此，二人見面更加小心，返到屋企就拉晒窗簾以免再中招。
上週二（三月四日）晚十點半，本刊發現楊千嬅與丁子高及丁母等人在灣仔世紀酒店食飯，離開酒店時，原本與丁母邊行邊講的楊千嬅發現記者拍照，即時一愕並快身閃開與另一友人同行，丁母亦急步行近兒子身邊，同楊千嬅扮唔識。
至於戴住鴨舌帽的丁子高，見有記者即全程耷低頭，表現鬼祟。當酒店職員將其寶馬座駕駛到門口時，他立即與母親及一名女子跳上車，完全無望過楊千嬅一眼，本來諗住同男友一齊上車的楊千嬅，亦焗住改變計劃，與同行的女性朋友到酒店外截的士，為了岔開話題，她更扮無事發生叫記者幫她手截的士。
分手煙幕
據知，拍拖半年的楊千嬅近月落力同男友家人培養感情，又陪男友與母親共聚天倫，早前有傳楊千嬅想把感情急凍，實情只是煙幕。
「之前俾人影到去丁子高屋企食飯，個個都話係丁子高擺佢上台博見報，千嬅唔多唔少都信㗎，加上丁子高又再度活躍夜場，好多人都以為佢哋玩完，點知原來無散到；千嬅仲同人哋阿媽好熟絡，個個都笑佢行奶奶政策！」知情者說。
儘管身邊人唔睇好，楊千嬅依然勇往直前，「情場老千」丁子高，絕非浪得虛名。
楊千嬅同丁子高及其母吃飯後離開，本來三人行，一見記者拍照即時各自彈開。
一直不認同丁子高拍拖，楊千嬅被撞破好事，緊張得揸緊拳頭。
今年初，楊千嬅到訪丁家打邊爐，兼同丁子高打情罵俏，女幫男揼骨，男同女搓臉。（《FACE 》圖片）
