著數優惠交流網 » 影視、娛樂交流區 » 恃李澤楷照　Isabella反骨行動升級

恃李澤楷照　Isabella反骨行動升級

1^# 大中小 cheshire (IP: x.184.192.x) 發表於 2008-3-13 16:56 發短消息只看該作者

探熱針:恃李澤楷照　Isabella反骨行動升級梁洛施（Isabella ）自從搭上富貴李澤楷後，恃住有人撐腰，公然跟經理人公司英皇對抗，失蹤推job ，即使再被雪藏，即使跟公司仲有十年約，但Isabella 繼續唔怕死，兼且將行動升級。
聽從男友向外發展的她，早前更以冇時間為由，拒拍港產電影《深海尋人》（前名《見鬼3》）海報，完全當公司無到。
雖然有說李澤楷會不惜代價為女友贖身，不過英皇老闆楊受成就嬲到震，企硬唔輕易放人。私自推job
梁洛施跟鑽石王老五李澤楷拍拖三個月以來，因為有大水喉射住，就算推job 得罪公司都生活無憂，以往慳得就慳的她，生活愈來愈富貴，不時一身名牌跟梁母在君悅酒店high tea 。
原來唔開工一樣有收入。Isabella 全靠男友教路投資股票，短短數月就賺過百萬。農曆年期間，她更帶同母親以及家姐一家到日本及韓國，全程使費由男友包辦。
有恃無恐，繼搵律師要求跟英皇解約後，Isabella 近日又再自把自為，拒絕為已經完成的《深海尋人》拍電影海報。本來有機會同徐克合作，Isabella 一直表現雀躍，即使在戲中被李心潔摑到鼻瘀，都話打得好爽。
不過自從男友教Isabella 向外闖唔好再接港產片，她就聽話到連電影海報都唔拍，更自己親自致電施南生，瞞住英皇推嘢唔做。據電影幕後人員透露：「Isabella 話自己近排好忙，所以唔得閒影海報，施南生話幫佢再度期，而家先影咗李心潔，但點都會等埋Isabella 。」
東方電影公司方面亦表示，Isabella 在拍攝海報當日未有出現，不過會等她再俾期補拍。
冇咁易放人
Isabella 當經理人冇到，連老闆楊受成亦唔放在眼內。據知，楊受成知道李澤楷想買斷Isabella 的合約，已講明唔會輕易放人。
「楊受成知道李澤楷想幫女朋友贖身，但就冇諗過咁易放人，仲話『有人同佢買斷份約，我就放人，第時又話有個闊太想幫霆鋒買斷份約，咁間公司仲使做？！』所以佢唔會咁容易俾Isabella 走。」知情者說。
致電Mani （經理人霍汶希）求證有關Isabella 私下推job 一事，她說：「Isabella 嘅嘢已經交咗俾律師處理，我唔會再回應。」