封面:楊紫瓊搭路 2億贖身 李澤楷上海一晚追掂Isabella6月才20歲的梁洛施（Isabella ），早於12歲便簽約楊受成的英皇娛樂，長命契綁足15年，去年曾因臭寸失場兼與音樂人陳輝揚拍拖，遭公司放入雪櫃。跪晒玻璃，雪藏期縮為3個月，不過年少反叛的Isabella ，完成荷里活大作《盜墓迷城3》後，更加唔識死，改電話、推job 、靠律師與公司傳話，據傳只因結識了首富李嘉誠之子李澤楷，有人更考慮為Isabella 億億聲贖身。
一直與母親相依為命的Isabella ，去年11月靠紅娘楊紫瓊介紹，即與41歲李澤楷打得火熱，鑽石王老五更在上海包場兼送上兩打紅玫瑰示愛，Isabella 點會唔心動？
去年Isabella 與杜汶澤合演《伊莎貝拉》而獲得葡萄牙波圖國際電影節的最佳女主角獎項後，即被荷里活導演睇中，打低一眾鬼妹仔候選人，成為《盜墓迷城3》的第二女主角，為進軍荷里活鋪定路。
外灘漫步
戲中飾演楊紫瓊（Michelle ）女兒兼女殺手的Isabella ，原來早得這位哎呀媽媽出手幫助。
Isabella 與超級富豪李澤楷的初次約會，就是靠楊紫瓊在上海悉心安排。「Michelle 同Richard （李澤楷）好好朋友，有次Richard 專登去上海探Michelle 班。Michelle 知道Richard 一直對Isabella 有好感，所以當晚帶埋Isabella 出去啦！」知情人士說。
據知當晚眾人約在外灘的M on the Bund 晚飯，李澤楷更預先包起全場。Isabella 剛現身，李澤楷即手拎早已準備好的兩打紅玫瑰花送給她，Isabella 在不知超級富豪李澤楷會在場時，收下她最愛的紅玫瑰，飯局中眾人無所不談，更飲了10多支香檳。「Michelle 仲問Bella （Isabella ）：『佢（李）好少對女仔咁㗎，你對佢有冇意思呀？』」知情者說。之後兩人更在外灘深宵漫步，非常浪漫。
經過上海鮮花攻勢浪漫的一晚後，李澤楷和Isabella 即打得火熱。「佢哋約會好小心，唔係出埠就係出海，最初佢哋拍拖真係冇人知，不過到咗今年頭Bella 忽然搬番入貝沙灣，仲要住獨立屋添。」
紅娘帶挈
Isabella 有幸參演荷里活大製作，與楊紫瓊在戲中演兩母女，這位片中好「媽媽」除一力撮合李澤楷和梁洛施，更勸Isabella 要找個好的經理人開拓國際市場。阿女果然聽話。
火速冧暈
向來浪漫的李澤楷試過帶女伴上自己的遊艇August Moon 邊飲紅酒邊談心，而楷楷今次追Isabella 亦落足心思，在上海包場燭光晚餐，又一早收風，送Isabella 最愛的紅玫瑰，有傳Isabella 仲巧合地搬入約1億3千萬的貝沙灣獨立屋。
包場費：$8萬
最低消費：$11萬連加一
小小超為得到Isabella 芳心，由香港飛到上海，以19萬包下外灘前日清大樓頂樓西餐廳M on the Bund 製造浪漫，好豪氣呀！
2打玫瑰：$1,000
小小超知道Isabella 最鍾意紅色嘅花，所以專程買咗2打紅玫瑰約1千，親手送畀Isabella ，再全晚豪開香檳，好有情調啫！
浪漫無價
晚飯聚餐後，小小超再帶Isabella 行黃埔外灘，外灘最出名嘅就係夜景同埋燈飾，咁浪漫嘅晚上，相信會令Isabella 畢生難忘。
1億3千萬獨立屋
Isabella 之前住過貝沙灣，後嫌租貴搬去同區碧瑤灣，但最近巧合地搬回貝沙灣，仲要係市值約1億3千萬獨立屋。
2億贖身
巧合地，以往對投資毫無概念的Isabella ，近幾個月卻在股票投資市場大有斬獲，而兩母女亦比前衣著光鮮得多。
消息指，近月她更多了一張附屬咭，上月有人目擊她與媽咪到LV 、BV 等名店掃新貨，與以往只會找助手幫忙搵贊助商提供靚衫、買個袋都要左度右度的她，差天共地。
去年尾，Isabella 更大口氣地對記者說，有意於聖誕節包團請全家去旅行。據知進軍荷里活的Isabella 接拍新戲《盜墓迷城3》只有約80萬片酬，但英皇抽佣6成，直接落袋其實並不多，如今有大水喉射住，Isabella 有恃無恐，更即時與母親改手提號碼，與英皇斷交，而李澤楷更為Isabella 鋪定路，準備為她贖身。「2個月前左右，Richard 同大國文化（李為幕後老細）高層講，遲啲會簽1個人返嚟！之後就搵律師研究Isabella 份約，睇吓可唔可以唔使一分一毫，就可以幫佢解到約！」
消息指，Isabella 絕到靠律師與英皇對話，而英皇上下均大為震怒。「楊生（楊受成）好嬲，如果係Richard 親身打畀佢，話想贖身，都話大家有商有量，而家靠律師傳話。」據知，英皇內部亦有應對，Isabella 尚餘10年合約，保守估計贖身價為2億。
優悠生活
Isabella 拍完《盜墓迷城3》後，只在1月出席過一個公開活動，近月Isabella 都只有被影到出入名店，同埋閒時去提款機攃錢，十足闊太生活。
昔日執2攤
未富貴的Isabella ，早兩年仍然要麻煩助手幫助四處借衫出騷，去年4月出席電影節記招，就執咗名模陳嘉容二攤（右圖），著咗同款同色嘅Valentino 晚裝示人。
失蹤冇影
今年英皇春茗，Mani （黃圈）打鑼都搵唔到Isabella ，據知後來要搞到寄掛號信至搵到，最令Mani 激心係Isabella 呢頭應承會出席，到頭來都係白等，成為決裂導火線之一。
富貴母女
22年忘年戀，Isabella 早前接受訪問時亦說：「我而家搵男朋友都會搵個成熟啲嘅！」自06年與音樂人陳輝揚搞忘年戀，導致心散、失場兼向助手大發脾氣後，即被公司雪藏。Isabella 手停口停，惟有由月租5萬5的貝沙灣2座寓所，搬到較平租、每月2萬2的碧瑤灣暫住。不過自李澤楷出現後，近月Isabella 已火速搬回貝沙灣，更愈住愈豪，進駐一億三千萬獨立屋，出入更有司機、保鏢傍實。
Isabella 生活有變，其母親亦開始過闊太生活。「佢媽咪以前淨係跟住個女，個女去邊佢就跟到邊。不過而家唔同晒喇，佢阿媽又學插花、又學社交舞，當正自己闊太一樣！」知情人士說，連Isabella 身邊的髮型師密友Adrian 亦在股壇大有斬獲。「Adrian （髮型師）話而家即使得番Bella 一個客，下半世都唔憂。」
超人皺眉
鑽石王老五李澤楷身邊一直不乏女伴，其任職滙豐投資顧問混血女友羅愛欣（Rachel ），早前被記者問起情人節點過時，甜絲絲神秘回應：「你話呢？」。不過據知近日二人已另結新歡。
上週五（7日）下午6時，於中環滙豐總行收工的Rachel ，早已有老外男伴在樓下接收工，當Rachel 被問到是否跟李澤楷分手時，先錯愕O 嘴，再以廣東話回應：「呢啲嘢你問番李生啦！」記者再問她是否認識Isabella 並展示其照片，Rachel 先認真睇相，搖頭表示不認識後，其男伴更細心地為Rachel 截的士解圍。
小小超舊愛有仔慰藉，但據知Richard 二千億身家老豆李嘉誠，卻對兒子戀上Isabella 一事，頗不以為然。「超人都係上星期睇報紙先知。」消息指，李嘉誠更託一位相熟的政界猛人致電李澤楷訓話，「幫佢教仔」。一名熟知李家人士就慨嘆：「Richard 對戀情一向好低調，而家兩個人之間嘅嘢都揚得出嚟，你話就算係真事又點，真係戲子無情。」
英皇經理人Mani 本週一（10日）就對記者說：「現階段真係冇嘢可以講！總之錢唔係最重要嘅問題，無論以後點都好，我冇嬲過Bella ！」
中四輟學
擁有葡萄牙血統、原名Luisa Isabella 的梁洛施，有傳系出澳門名門殷理基家族，其父Luis Alberto Marques 在她半歲時因服食過量藥物身亡，自此與曾在澳門葡京賭場任職的母親及姊姊相依為命。
Isabella 母親忙於工作養家，疏於管教，99年入讀油麻地保良局陳守仁小學，但傳她多次被記過，及後返澳門讀澳門三育中學時，傳被勸喻離校，後由英皇安排她入讀當地國際學校，她亦承認中四未畢業，趕入娛圈。
麥玲玲：出嫁機會微
據玄學家麥玲玲說：「佢鼻夠高，有能力使富貴男友嘅錢，亦好適合配大夫（比自己大8至10年的男人），加上佢命格屬土，拍拖對象大部分係有錢人；可惜佢個鼻高得嚟唔夠靚，同富豪結婚嘅機會好微，而且佢應該係26歲後先會結婚，又同李澤楷冇夫妻相，所以今年應該唔會結婚。」
街坊：一定嫁唔成
我出世 你做工
今年19歲的梁洛施與41歲的李澤楷年齡相差接近22年，一向偏愛成熟事業型女性的楷楷，今次情迷青春兼中四都未讀完的Isabella ，唔通係時候要轉吓口味？
19歲上岸
廿歲未夠的Isabella ，青春無敵，一直都是不少少男心目中的女神，不過係估唔到，大Isabella22年的小小超李澤楷都啱呢款口味啫！
41歲攻勢
坐擁90億個人身家的李澤楷，是不少港女心目中的理想對象，如今楷哥追掂Isabella ，睇怕各女士們都要放長雙眼睇定啲先。
據知楊紫瓊（左）與小小超稔熟，是由楊敏德（右）介紹下而老死，曾先後是潘迪生妻子的「孖楊」，與小小超不時有聚會。
