娛樂頂點:秋官反擊指摘：要我父女反目勢係假！
肥肥喪禮於加拿大時間2月27日上午10時（即香港時間28日凌晨），在溫哥華Burnaby 區的科士蘭墓園內的教堂舉行，而連日在上海橫店趕戲的秋官，未能出席送前妻最後一程，但仍送上肥肥生前最愛的白蘭花致意，他亦請定假回港，出席3月2日在紅館的肥肥追思會。
據知欣宜內心深處當然想爹哋出席母親喪禮，但又怕父親遭母親親友白眼，為免成為長輩間磨心，欣宜曾致電著秋官不要到加拿大，只要出席追思會就好。欣宜的心意，秋官當然明白，但對於「冷待欣宜」的指摘，秋官則憤憤不平︰「對我公平啲……要我父女反目就勢係假！」
個女明白我就得
正當剛滿廿一歲的欣宜，在加拿大孤苦地送別母親肥肥入土為安之際，她在世上僅餘的至親──爸爸鄭少秋，卻在千里之外的上海橫店，趕拍內地電視劇《書劍恩仇錄》。
肥肥臨終一刻，秋官沒趕到醫院見前妻最後一面，即引來肥肥密友的冷嘲熱諷，先有陳淑芬指摘「秋官在肥肥死後冇搵過欣宜」，後有欣宜契爺鄧光榮怒插︰「欣宜有老竇等於冇老竇。」眾矢之的嘅秋官，被指冷酷無情，諸多藉口，連前妻在加國的喪禮也不出席。
千夫所指下，秋官依然沉默地日接夜拍劇，直到本周二，肥肥在加國舉行喪禮前一天，他終於谷到爆申辯︰「其實我並不想多講啲咩，清者自清，個女明白我就得，反正我講咩都會招人話柄。但傳到我同欣宜父女反目就勢係假，我唔可以再忍，亦希望外間對我要公平啲！」
秋官感嘆話：「喺阿肥死嗰日，我已經即時同欣宜通過電話，之後一直都同佢保持聯絡，電話打得通就打電話，電話打唔通就傳SMS ，我助手阿燕有晒紀錄。我問心對得住阿肥，從來冇對唔住欣宜。
用性命擔保會錫個女
「個劇真係好趕，我同個女（欣宜）話會飛去加拿大出席喪禮，但個女講咗句令我覺得好warm 嘅說話，佢話：『爹哋，你年紀都唔細啦，拍劇已經咁攰，仲咁遠飛去加拿大，舟車勞頓會好辛苦，不如你淨係出席追思會啦！』佢咁識體諒爹哋，證明欣宜已經大個女啦！
「欣宜永遠係我嘅乖女，之前喺阿肥病時，我已經同欣宜講過：『爹哋屋企嘅大門永遠為你打開。』只不過係佢唔習慣，所以至冇嚟住過啫！其實我太太（官晶華）都唔介意欣宜嚟住。我都有叫兩個女以後（肥肥死後）多啲搵家姐（欣宜）出嚟行吓街㗎！我係佢爸爸，點會唔關心佢，外間嘅人又知道幾多？但我唔想多作解釋，一定要講清楚，我用條命擔保會錫欣宜。」
至於肥肥逝世後遺產如何處理問題，成立的遺產基金和信託人又如何處理，秋官說：「一切喺佢媽咪（指肥肥）生前已安排好，毋須我太操心。」
2月27日︰葬禮守衛森嚴
本周四凌晨2時，秋官還在橫店片廠內趕戲，而肥肥於加拿大的喪禮，已經正式於當地時間早上10時許揭開序幕，為免被記者拍攝，墓地四周圍了欄杆，周圍更有騎警駐守，守衛森嚴。
秋官在橫店拍劇以來，其助手阿燕（黑衣女士）都貼身服侍。上周六，她還替秋官發SMS 給傳媒，指欣宜提出叫秋官毋須出席肥肥加國葬禮，建議他只出席香港追思會。
秋官悶悶不樂
近月一直在橫店趕拍劇集的鄭少秋，每日一早到外景場地趕戲，直至拍到晚上九點才收工，有時甚至要日接夜拍。劇組人員透露秋官近日亦一反常態，悶悶不樂，不用埋位時亦匿入座駕，甚少與人傾偈。「以前跟秋官拍戲，他最愛哼劇集主題曲娛樂大家，但近日見他神色凝重，經常傳短訊或者打電話，說他冷酷無情真有點那個。如果他拋下全組離開一個多星期，對我們真是冷酷無情，反而我們佩服他可以若無其事繼續開工。換了是其他人，一定拿小工發脾氣，但他卻沒有。」
秋官將會出席周日（3月2日）肥肥在香港的追思會，記者問秋官屆時會否在追思會上致悼詞，他沉吟道：「仲未知，我依家只知道盡量趕拍多啲戲份，到時抽身返香港，唔想對劇組影響太大。」
欣宜冷對父親
2月21日，問到秋官可會到加國送肥肥最後一程，欣宜冷淡地說：「你哋自己問佢啦！」
親友齊揀花牌
送給肥肥的花牌，大部分都在一間名為「Florist 」的花店訂購，價錢由1百至4百元加幣（約港幣8百至4千）不等。26日，肥肥好友、恬妮（左）、岳華夫婦，就與一班好友及肥肥家姐齊來訂花牌。
蔡和平鬧秋官不念親恩
蔡和平在一雜誌訪問中狂數秋官：「佢在情在理都應該返嚟處理肥姐身後事。以往阿秋都冇乜照顧欣宜㗎，淨係上年《歡樂今宵40周年》一齊出過嚟，都唔知佢咁多年有冇俾過家用添。」
訂「肥肥日」紀念笑聲
加拿大溫哥華市長蘇利文，宣布每年六月一日（肥肥生忌）訂為「肥肥日」（MS.FEI FEI DAY ），除表揚肥肥對當地華人社區的貢獻，亦讚揚她是社區文化大使，為卑詩省數百萬人帶來歡笑，而他亦感激肥肥組織香港藝人在溫哥華做善事，全省都會懷念她。據他透露，原先有人提議將當日命名為「沈殿霞日」，但他認為公眾會對「肥肥」這個稱號感到更為親切，因此決定向肥肥家人建議採用「肥肥日」，此舉可以話史無前例。
插秋官薄情
肥肥離世後，好友們除了協助欣宜辦理好母親身後事外，更猛轟肥肥前夫鄭少秋薄情，指他根本冇理過欣宜和肥肥。
鄧光榮斥秋官無盡父責
2月19日，鄧光榮出席無線特備節目《肥姐我們永遠懷念您》，直斥秋官說：「阿肥不嬲都係獨力湊大欣宜，欣宜有老竇等於冇老竇。」
陳淑芬暗
秋官冇搵欣宜
2月21日，有指肥肥去世前一天曾跟秋官聯絡，陳淑芬在電台訪問中斬釘截鐵表示：「冇咁嘅事，根本冇諗過搵佢，人哋都有屋企。但欣宜需要support ，如果爹哋安慰吓係件好事，打俾個女都係支持，因為欣宜短時間內失去兩個至親。」
拒秋官出席加國葬禮
對於秋官會否出席肥肥加國葬禮，2月23日陳淑芬冷淡地說：「呢個係私人葬禮，只有肥姐親屬、摯友出席。」
憶亡母點滴
加拿大時間26日中午，欣宜在陳淑芬及姨丈姨母陪同下，到當地City Hall 為肥肥領取「好市民獎」。當地市長Samuel Sullivan 宣布，自2008年開始以肥肥的生日日期──6月1日，定為Fei Fei Day （肥肥日），紀念她生前為溫哥華市作出的慈善貢獻。
欣宜代母親領獎時，她先多謝市長，並表示媽咪好愛溫哥華這個地方︰「佢每次返來都好雀躍嗌︰『I am coming home.』……媽咪知道嗱呢個獎，一定會好自豪好大聲笑……」談及與母親以往一些生活點滴時，她一度眼紅紅，「我知再冇機會同媽咪喺溫哥華藝術館附近咖啡店享受多一杯咖啡……同佢分享戰利品，同佢喺Granville Island 食一籃籃嘅魚柳同薯條，依家感覺唔同（語塞想喊），佢亦再冇機會陪我玩滾軸溜冰……多謝溫哥華市對我哋嘅慈愛同關心……我好期待嚟緊嗰一日Ms.Fei Fei Day 。」
一生以父母為傲的欣宜，初嚐喪母之痛，身邊有眾多uncle 及auntie 愛錫，而連日來陪伴欣宜左右的陳淑芬亦饒有深意說︰「欣宜去邊，我就陪佢去邊。」
但父女始終是父女，秋官的愛，欣宜又豈會不稀罕。連日來強忍淚水的欣宜，相信也期待著3月2日追思會，伏在父親肩膊上狠狠痛哭一場罷！
欣宜出面攬秋官
據知，連日來秋官被肥肥好友連環炮轟，欣宜私底下曾作出調停，為免雙方長輩再起爭拗，欣宜曾懇求陳淑芬不要再罵秋官，更說︰「我得番一個爹哋咋，唔想佢難過。」事實上，當記者之後再問陳淑芬時，其態度已軟化，更突然轉口風為秋官講好話，「大家都有新生活，秋官都係盡朋友心，何必令佢成為磨心？」至於早前狂轟秋官不理欣宜的鄧光榮，亦收口話：「佢火唔火關我咩事，你唔好再問，你再問我cut 你線㗎！」與早前的激動表現判若兩人。
愛之深，恨之切，肥肥的親友對秋官恨之入骨，全皆因緊張肥肥及欣宜。一位不願透露姓名的電視高層透露︰「阿秋阿肥同我都咁熟，見到依家咁，我都好唔安樂。我知阿秋都好想去加拿大出席喪禮，但陳淑芬揸晒旗，邊度到阿秋出聲啫。加上肥肥成班親戚都當阿秋係仇人，佢哋覺得阿肥得個咁嘅病，都係因為佢，欣宜都知㗎，所以佢咪叫爹哋唔使去加拿大囉，佢都怕成為大人嘅磨心。其實佢個心梗係想親多啲爹哋，始終血濃於水，呢啲冇嘢可代替。」
在陳淑芬的安排下，欣宜24日已經將母親的遺體運返加拿大。連日來，她都住在姨媽家中，甚少外出，只見陳淑芬與岳華四處奔波，為肥肥喪禮訂白蘭花及開會商討喪禮細節。
福地安葬求後人平穩
肥肥於加拿大時間27日早上10時至2時，是安葬的好時辰，而她在加國落葬的科士蘭墓園，屬孖穴位，據知肥肥在生前早已買下這塊福地，位置坐北向南，據玄學家麥玲玲表示，外國墓園一般以大草園平地為主，雖然並非極靚風水，但後人可以平平穩穩，無風無浪，而土葬較火葬容易影響後人，更會影響三代。
整個葬禮由於要聘請來自香港的保安人員負責整個喪禮的保安工作，布置禮堂的香檳玫瑰要由美國入口，加上棺木需預先噴上一層銀油作防腐作用，葬禮雖然莊嚴低調，使費卻不菲。
墓地（孖穴位）︰21,200加幣（約169,600港元）
西式棺木（加噴銀油防腐）︰200,00加幣（約160,000港元）
場地布置（包括美國入口香檳玫瑰）︰12,000加幣（約96,000港元）
禮堂租用費︰2000加幣（約16,000港元）
靈車租用費︰500加幣（約4,000港元）
墓地開關費（需用起重機將棺木入土）︰1295加幣（約10,360港元）
聘請香港保安︰約120,000港元
葬禮費合共575,960港元
無線百萬追思會
由無線協辦的《肥姐我們永遠懷念你》追思會，將於3月2日下午2時在紅館舉行。據無線外事部副總監曾醒明透露，早前已擬定一份嘉賓名單，大部分都是肥肥生前圈中好友，但需由肥肥親屬最後通過。問到當日秋官會否出席，曾生表示：「我哋名單上有佢個名，欣宜亦講咗想爸爸當日出席，以我所知，秋官已經同劇組請咗兩、三日假，我諗佢當日應該會到。」
場內布置一律用上肥肥喜歡的香檳色做主色，以莊嚴溫馨為主。至於當日所使費用，粗略估計逾百萬。「肥姐係無線大家庭嘅重要成員，佢嘅事等如TVB 嘅事，公司唔會計較使幾多錢，最緊要全心全意做好呢件事。」
紅館租場︰$10萬
場內布置︰$40萬
音響、燈光器材租用︰$30萬
保安人員︰$6萬
紀念特刊、CD 及門票印刷︰$25萬
追思會花費合共︰約$111萬
連日來，秋官在橫店趕拍大陸劇《書劍恩仇錄》，未能出席肥肥的葬禮，惹來連番「薄情」指摘。
問到秋官點解唔出席加拿大喪禮，欣宜反一反白眼扮聽唔到，嘴藐藐走人。
本周二晚，秋官接受本刊記者訪問，還大方讓記者登上其座駕，言談間，他對有傳他和欣宜反目一事頗為激動。
由於橫店氣溫寒冷，秋官穿上皇帝戲服前，都著晒厚厚保暖衣打底，還有工作人員服侍。
