唔經唔覺，肥姐沈殿霞已經走咗五年，上個禮拜六（六月一日）晚，一眾圈中好友包括汪阿姐、張學友、楊千嬅以及大班EYT同事，一齊响紅館演出紀念騷，向肥姐致敬。
肥姐愛女欣宜壓軸出場，以前一提起阿媽就喊嘅欣宜，一直忍住眼淚載歌載舞，重新演繹Britney Spears名曲《Oops!...I Did It Again》，以及自彈自唱《愛．回家》主題曲《擁抱愛》。
欣宜响台上公開多謝媽咪，又感激一班《畢打自己人》嘅藝員，陪佢度過肥姐離世後首個聖誕節，欣宜仲話陳淑芬雖然好惡，成日鬧人，但一切都係為咗佢好。
至於老豆秋官，欣宜唔敢多提，只係响開騷前提到有同爸爸通電話，秋官仲話可以借個私人助手俾佢幫輕吓。由當年俾人噓爆嘅白雪公主到今日自食其力，欣宜或多或少得肥姐餘蔭，秋官大方借出助手，唔使咁客氣啦。
欣宜坐上巨型眼鏡被吊到半空，佢話雖然效果好靚，但當時其實驚到腳震。
欣宜第一次踏上紅館舞台，重要時刻秋官例牌冇影，返咗國內拍攝《舞出我人生》節目。
重播肥姐片段，難免會再次見到230磅嘅欣宜，佢話唔介意，事關佢為咗呢個騷都減咗十幾磅，比當年扮Britney Spears輕好多。
到完騷大合唱《真的愛你》，欣宜終於忍唔住喊，而佢身邊嘅曾志偉，話會同學友等人監察門票收入，一定會捐去福幼基金。
紀念騷唔想太煽情，於是安排志偉扮肥姐踩雞蛋搞笑，鵬哥就大爆肥姐平日比佢更粗口，所以爆肚講咗句「沈殿霞試咪，盧海鵬都要坐低」。
