入行八年出咗四張碟嘅欣宜，終於等到機會開騷。攝影：沈健程
入行八年嘅鄭欣宜，終於等到機會開騷，於下月假Star Hall舉行兩場「女神有問題演唱會」，日前佢喺中環接受專訪，解釋個唱個名有意思：「一個係我有問題想問，另一個係我有問題存在，恐懼係其中之一，我好驚停留一個位置，唔再成長唔再進步！」
吳業坤被網友笑出兩隻碟就踩上紅館，其實欣宜都只係出咗四隻碟，佢又夠唔夠歌呢？欣宜話：「其實冇歌都可以做演唱會，睇你想做啲乜同擺幾多心機，原來我plug過嘅歌都有二十幾首，但hit嘅得三首！Wow，OK嘅，我都會唱吓其他人嘅歌。」
欣宜話好驚停留一個位置，唔再成長唔再進步。
欣宜試過直踩五十粒鐘冇瞓，覺得冇嘢做先係捱。
屋企等工作
新歌《女神》爆紅造就欣宜開騷，佢感慨話：「因為呢首歌，大家覺得我係好堅強好樂觀嘅人，其實我都會有唔開心、迷茫、困難時期，之前直踩五十個鐘冇瞓，我覺得自己好叻呀，點解可以唔瞓嘅，我座右銘係船到橋頭自然直，煮到埋嚟就要食，覺得冇嘢做先係捱，試過喺屋企成日等工作，望唔到前路，諗住放棄做呢行，好在冇放棄，否則唔會有自己舞台。」
欣宜話𠵱家心情未識緊張，好興奮好期待：「八年呢段時間唔可以話長，但絕對唔係短，我嘅青春已經擺晒呢行，無論點我都要殺一鋪，我唔係唱歌真係最好聽，亦唔係跳舞最好睇，但我絕對保證一定用盡力去做。」
撰文：馮仁昭
化妝：Samuel@江中平化妝室
髮型：Milk Chan@Xenter
場地提供：Spark Bar& Restaurant
from:
http://hk.apple.nextmedia ... 160922/19777577
