媽咪姐收到風，話阿B （鍾鎮濤）近日出書數臭章小蕙，其中一個原因，係幫現任老婆范姜出口氣。聽講時至今日，范姜響屋企仲不時收到電話，爆晒粗咁鬧：「死八婆，好X 還錢呀！」原來仲有人追章小蕙還錢，打錯俾范姜！
不過，有人就奇怪，俾前夫數臭嘅章小蓴，點解靜如深海，粒聲都冇？原來章小蕙佳節當前，忙於搵老細，唔得閒同阿B 鬥。不過，佢就搵咗個老死同媽咪姐講：「你估個阿B 又好好咩？佢一句申請破產，啲債就全部賴晒落前妻身上，如果唔係樓市近排升番，Teresa （章英文名）嗰2.5億債到依家都仲未甩得身呀！」
呢位章小蕙好友仲忿忿不平咁話：「其實佢（章小蕙）都幾可憐，仔女唔跟佢，一個人孤零零，又唔係後生女啦！想再搵個好男人，或者再搵錢，你估咁易㗎？」
正所謂「清官難審家庭事」，阿B 同前妻章小蕙嘅恩怨怨，相信就算包公再世都審唔掂誰是誰非。
做男人咁冇口德。（設計對白）
阿B 響佢本新書《Macdonnell Road 》狂數前妻章小蕙臭史。
