黃長興和03年港姐冠軍曹敏莉，去年8月參加湖南衛視的《舞動奇跡》節目時，有傳長興向曹敏莉大獻殷勤，兼日夜陪練舞，成功打動伊人芳心，港男港姐配到絕。
雖然二人夾晒口供否認，不過上週六（上月29日）卻發現長興密密睇佐敦港景峰租盤，似乎想搬近曹敏莉，以後見面照顧更方便，之後長興再順便揀埋大床兼枕頭，事後仲甜絲絲話：「我都係睇吓樓啫，佐敦方便啲囉！」
係呀，方便接女友囉，明晒！
上週六（29日）下午1點，黃長興先於柯士甸道地產鋪徘徊，不斷在鋪外睇盤兼格價，手上更嗱住大
樓盤宣傳單張，之後又單拖睇大床兼買枕頭，似乎為搬竇做好準備。
換竇表誠意
據知長興對佐敦區豪宅港景峰、月租約$25,000的799呎單位甚有興趣，無獨有偶，因一舞撻著嘅港姐曹敏莉亦居於佐敦覺士道的嘉文花園，由港景峰步行至女方住所10分鐘即到，據經紀透露：「佢（黃長興）指明要兩房，佢仲話一定係佐敦區，話方便約朋友喎！」
方便見面係首要原因，另外亦因為長興現居住的西環單位是跟前女友BiBi （梁寶賢）的同居竇，當然極速睇樓換竇。
親近三部曲
睇樓盤
港景峰02年落成，位於廣東道及柯士甸道交界，建築面積由700幾呎起，租金約$25,000，可惜長興搵樓當日未有現樓睇，惟有睇住價先，長興話：「我都係租啫，2萬零蚊都畀得起！」
試大床
查詢租盤後，長興即去尖沙咀海港城一傢俬店揀雙人床，期間長興對一張價值5萬4的雙人床好有興趣，又坐又攃並向sales 表示：「我想要king size ！」兩個人訓啱啱好。
買枕頭
之後長興再走去附近商場買咗個99蚊嘅枕頭，問佢係咪買新枕頭畀女友，他立即話：「最近工作太攰，所以要換個枕頭，個舊枕頭訓得唔舒服。」
情侶搵真銀
其實一個法國長大、一個美國留學，鬼聲鬼氣自然啱傾，加上長興出名細心，湖南一個月嘅噓寒問暖，撻著都唔出奇，情侶關係更帶挈佢哋多咗出騷機會，早前2人更以情侶身份出席餐廳聖誕宣傳活動，實行有錢齊齊搵。
上週六（29日）本刊問黃長興是否想搬近曹敏莉時，佢就甜絲絲話：「你點知㗎？我係就係睇緊樓，不過都係想方便啲啫！（方便近啲見曹敏莉？）咩呀！我同曹敏莉係friend 咋，唔好咁講啦！」
新女友又靚女又可以拍檔搵銀，拍拖其實唔使怕醜啦！
最掂港男
法國長大的黃長興回港參加05年港男得冠軍，靚仔兼身形健碩，入行兩年，愈撈愈出位，繼之前代表TVB 參加《舞動奇跡》後，又拍攝高清劇集《野蠻奶奶大戰戈師奶》，與阿姐做對手戲，最近又拍緊《甜言蜜語》任第2男主角，港男中佢最掂檔！
為女搬竇
港景峰同嘉文花園相隔一條柯士甸道，步行10分鐘都唔使，一條大直路轉個彎就到，搵女友零距離。
早前黃長興與女友曹敏莉公開響餅店活動中大晒恩愛，女嘅一句聖誕冇禮物，男嘅即刻話：「咁我送畀你！」長興冧女其實幾醒。
睇樓盤
買枕頭
