GetJetso Facebook 專頁
發新話題 Report thanks

封面故事:三年爭獎宿怨　黎姿住阿佘砌

1# 大 中 小 cheshire (IP: x.77.20.x) 發表於 2007-11-17 13:01  發短消息 只看該作者
相關主題: 封面 珠光寶氣 黎姿
無線台慶頒獎禮年年爭崩頭，今年由部頭約改簽經理人約的大、細契（李司棋及關菊英），可謂坐定粒六嗱「最佳女主角」及「我最喜愛的電視女角色」獎，無線為安撫一眾現有的「親生女」，惟有臨時加多個豬肉獎「內地觀眾最喜愛女主角」，但一樣分唔勻。
單睇牌面，阿佘主演的《歲月風雲》力壓眾花旦。不過，與樂易玲情如姐妹的黎姿，卻不斷在背後發功，一方面戮力建立「好家姐」形象，另一方面食住「哨牙妹」個勢，向高層力爭。三年前黎姿憑《金枝慾孽》贏阿佘，今年睇怕又係攃住佢嚟打。
台慶頒獎禮（11月17日）在即，各花旦、小生各出奇謀，作最後衝刺。而整年一直冇乜表現的黎姿，近日憑新劇《通天幹探》哨牙妹一角彈起。不過，據知無線鑑於04年黎姿嗱視后引來一片「造馬」聲音，為免重蹈覆轍，今年特設由內地觀眾投票的「男、女主角」豬肉獎，給予愛將林峯及黎姿。
打悲情牌
《歲月風雲》效應下，林峯嗱獎順理成章，但黎姿同阿佘就有得拗手瓜。對於此獎，黎姿志在必得，雖然細佬在瑪麗做頭骨手術，但她寧願醫院、無線兩邊走，不惜捱到病也日日出席宣傳活動。
據知黎姿本月13日曾「冧廠」請病假睇醫生，一招做到病，即時令各高層對她增加唔少同情分。為了拉票，黎姿在blog 上大打人情牌，寫著︰「如果今年可以拿到一個獎項給弟弟看，他一定會為我這個家姐感到驕傲……這個小小的心願，希望大家為我達成。」
對於黎姿苦肉計搶獎，阿佘私底下十分勞氣，曾與某藝員好友呻︰「我唔覺得邊樣差過佢，係冇人哋咁世界女啫。」
風騷揀戰衣
等住嗱獎的李司棋，近日已頻頻出動置裝，更不惜以萬元買靚衫，她風騷話：「TVB 剛剛帶挈我贏咗錢，豪啲又點話。」
句句有骨
11月14日，佘詩曼為《鐵咀銀牙》宣傳，談到黎姿與她爭獎，句句有骨。
忽：有周刊話黎姿用苦肉計爭贏咗個獎喎？
佘：嗱獎係要睇觀眾投票，唔係話你有啲咩辦法就可以嗱到獎嘅。
忽：黎姿響《通天幹探》中好大犧牲，扮醜女出位喎！
佘：醜女嚟嘅咩？佢點扮都唔醜啦！哈……佢咁貪靚。
忽：黎姿話想嗱獎同細佬沖喜。
佘：咁做有用咩？總之要實至名歸。
忽：覺唔覺佢贏梗呀？
佘：覺唔覺得呀？冇話邊個贏梗喎，係咪？未到最後一刻都唔知，我自己就唔會講呢啲說話。（你信心好大？）盡力而為啦！
忽：黎姿響blog 寫到明想嗱獎喎！
佘：佢叫人投票，呢個係拉票啫！
忽：你會唔會咁做？
佘：我趕戲趕到死！訓都冇時間，唔得閒整呢啲嘢，有時間我都會呀！
忽：有冇聽過有花旦送鞋送袋俾高層？
佘：我就冇囉！其他人我真係唔知呀！我覺得班高層係睇表現多過物質。
至於黎姿，對外界睇好她連奪兩個女主角獎，她風騷話︰「唔係掛？獎我冇諗，但係晶晶個角色真係好多人讚，有觀眾認同我好開心。」問到苦肉計搶獎，她說︰「梗冇啲咁嘅事！我依家淨係想幫公司完成埋套劇，然後全力照顧細佬……」談到blog 內恨嗱獎，她說︰「我呢輪真係好忙，呢啲嘢都係公司幫我搞。」
話就話唔恨嗱獎，但據知情者透露，黎姿在細佬撞車後，曾向無線辭演《珠光寶氣》，但某高層力說她，並暗示會戮力為她爭取今年台慶女主角獎項，黎姿才答允頂硬上。
面對黎姿的攻勢，阿佘亦暗中發功，冧《鐵》劇的監製唐基明，爭取此劇為台慶劇，為自己做勢。
鬥捱出位

三年宿怨
同劇爭獎
04年，黎姿及阿佘都以《金枝慾孽》角逐女主角獎。當年的台慶頒獎禮，黎姿事先張揚會戴三千萬鑽飾出現，阿佘即寸佢︰「幾多錢唔緊要，最緊要靚，我都想睇吓三千萬戴上身會點？」不過，阿佘最後叫贊助商加碼，並以八千萬首飾力壓黎姿，可惜最後都由黎姿奪視后。

笑住嚟寸
06年9月，阿佘密會樂易玲及陳志雲食日本菜，事後有指她設飯局拉攏高層。記者問黎姿此事，她笑住寸阿佘︰「咁講，我都要補請高層食飯啦！」之後阿佘以《鳳凰四重奏》贏了《胭脂水粉》的黎姿，連奪兩個女主角獎。黎姿被司儀嘟嘟問到感想時，表情尷尬苦笑。

攃住嚟搶
07年無線特設內地「豬肉」女主角獎，黎姿即使出各種招數，打壓阿佘，加上她有高層撐腰，嗱獎機會較大。
廖碧兒騷Quali
廖碧兒雖是今年「飛躍進步女藝員獎」大熱人選，但宿敵陳法拉有高層陳志雲撐腰，梗著數啲。不過經多番投票及評審後，廖暫時以大比數拋離法拉，局勢又再扭轉。廖碧兒更揀定過百萬鑽飾及低胸晚裝，誓要閃爆全場。
廖碧兒在尖沙嘴I.T 換上貼身低胸背心，盡顯豐滿上圍。
D&G 黑色背心：$3,300
foundation addict 銀色短裙：$2,999



廖碧兒獲BVLGARI 贊助近六百萬首飾，其中一套彩鑽首飾，頸鏈加耳環接近四百萬，彩鑽加上廖的黝黑色膚，襯到絕。
Fancy Sapphire 鑽石頸鏈：$292萬
Flower Sapphire 鑽石耳環：$95萬2千
名牌冧高層
其實，歷年來不少女藝員都會各出奇謀冧高層。據知情者爆料，某女藝員十分識做，得悉某高層愛LV 手袋及靚鞋，每年轉季，她都會在置地分店，叫相熟的sales 預留新貨給高層。而某高層歷年收收埋埋太多禮物，終於搞到要搬大屋。當藝員知道高層要搬屋，亦爭相送上電器及傢俬，作為入伙禮物，認真誇張！
雖然無線早已擬定一份得獎名單，但在頒獎禮前一日（即本月16日），仍要待無線五位巨頭（包括：方逸華、總經理陳志雲、製作部副總監曾勵珍，製作資源副總監樂易玲及製作部助理總監梁家樹）作最後表決，然後才發給贊助商「金至尊」在獎座上刻上得獎藝員的姓名。所以學阿佘話齋，未到最後，的確未知鹿死誰手。
阿佘收視稍勝
《通天幹探》有29點收視（約207萬觀眾收看），而黎姿在劇中的角色晶晶（右下圖），更在論壇視后投票中成為第一位。但講到收視，阿佘的《鐵咀銀牙》比《通》高兩點，平均31點，稍為勝出。
林峯會高層
今年走勢凌厲的林峯，因遇著陳豪所演的「得得哋」，對手太強無緣成為視帝。不過據知減少夜蒲、專心工作的林峯，得到高層樂易玲器重，今年劇接劇的他，中、港兩邊飛，所演的《歲月風雲》在內地大受歡迎。經投票後，「內地觀眾最喜愛男主角」非佢莫屬，分分鐘嗱埋「我最喜愛的電視男角色」。

節目巡禮當晚，林峯被廣告客戶圍住不停咁影相，只見樂易玲突然出現，站到林峯旁邊影合照，兩人咬耳仔近三分鐘，可見樂小姐真係好錫林峯。

林峯近年人氣急升，多間大品牌時裝店爭住贊助。日前林峯已到Armani 及Swanks 揀戰衣，件件都過萬。

封面故事:三年爭獎宿怨　黎姿住阿佘砌圖片1
我食硬你！（設計對白）
黎姿對《通》劇晶晶一角信心十足，說：「依家出街好多人都會嗌我晶晶，好開心！」
封面故事:三年爭獎宿怨　黎姿住阿佘砌圖片2
你出術啫！（設計對白）
問到睇唔睇好黎姿嗱獎，阿佘話：「我只係睇好大、細契。」
封面故事:三年爭獎宿怨　黎姿住阿佘砌圖片3
大契嗱視后眾望所歸，而「得得哋」陳豪嗱視帝機會亦最高，《溏心》仲勁到拍續集，難怪大契早前話：「擺唔到獎咪好瘀？」
封面故事:三年爭獎宿怨　黎姿住阿佘砌圖片4
樂易玲與黎姿感情要好。黎姿細佬出事，她亦抽空到瑪麗探病。
忽然一周第642期
相關主題:封面 珠光寶氣 黎姿
如果您喜歡這篇文章，請按「讚」或分享給您的朋友，以示鼓勵。

TOP

thanks