[資訊分享] 梅窩CAMP 靈異事件

今年八月我同聖堂成班朋友一共九個人入左梅窩去三日兩夜camp，我地用$1000晌信和租左一間上下兩層既渡假屋，租果陣連相都冇，因為個小姐話哩間渡假屋係全新裝修，我地係第一個租所以仲未有相睇，收尾我地見咁抵，而其他渡假屋又冇哂，卒之租左。

到我地去到之後，一睇發覺原來只係一間普通原本私人住既丁屋，只不過係佢將裡面裝修過，拎出黎當渡假屋。入到屋裡面發覺~

車.......原來係舊到死既爛屋，連陳年風扇都有

上面果層有兩個房，A同B同埋一個好陰邪既廁所

A房由兩個男仔睏，B房由四個女仔睏；下面果層就有廳同一個廁所一個廚房；上下兩層之間有一條長命斜樓梯

樓梯之牆上有一副超恐怖老虎狗相，上落樓梯隻狗眼都望住你。

頭果一晚都冇事發生，卒之第二晚(即係去camp第二日)黎料喇！

第二日下午我地多左一位朋友(Peter)連同佢太太入左黎玩(不過唔過夜)，果晚九點幾食完飯之後大家一齊返番去渡假屋，返番去之後我地大家九個人晌廳度玩啤牌，一個男仔去左地下廁所沖涼，另一個女仔就自己一個上左二樓B房傾電話。突然Peter 想去小解，咁我見地下廁所有人用緊就帶佢上去二樓個恐怖廁所，之後我就自己落番地下，Peter小解完之後落黎跟住就同我講........

Peter：阿Sam，除左阿恩之外仲有邊個晌樓上

Sam：下﹖咪你囉！

Peter：唔係呀！我話仲有邊個晌樓上呀，係咪XX呀﹖

Sam：唔係呀！XX佢晌廁所沖緊涼，冇人晌樓上啦！得阿恩之嘛！

Peter：唔係呢.......係仲有個人晌樓上呀！

Sam：下﹖唔好嚇我呀！做咩事﹖........喂，你地仲有邊個上左去﹖

我拎轉頭問佢地成班有邊個上左去，全部人數完人頭都冇，跟住問Peter發生咩事。

Peter：我頭先去完廁所跟住諗住見間房(B)房門close 左所以想睇下邊個晌入面啦，丫點知我一開少少門隙，見倒阿恩坐晌牆角，張牀之後就有個人坐晌度門隔離，張牀用隻手睏番埋度門，所以我想落黎睇下，邊個咁鬼衰玩我囉！

眾人面都青埋

Sam：你係咪眼花呀﹖

Peter：點會姐，我係見倒有隻手先至咁肯定咋嘛！我感覺倒佢係晌裡面有股力推番出黎架。

Sam：咁你見倒果個人係點樣架﹖係男定係女呀﹖

Peter：係一個長頭髮既女仔黎架，佢坐晌度門隔離張牀度個頭挨住牆，我一開門佢就用隻手推番度門出黎喇！

眾人面都白哂，班女仔更加即刻話唔敢睏果間房，後來房中講電話既阿恩落到黎，聽完之後就嚇到係咁不斷喊，停左喊之後佢話

恩：我頭先係聽倒好似有人晌度講野，不過冇乜留意

後來我地成班同埋Peter上番去睇，發覺有好多吻合地方，度門後面掛左個肉色衣架仲突左出黎，睇落似隻手，張牀上面就有個女仔朋友的衫褲晌度。卒之大家都自己呃自己當冇事發生，果晚成班人一齊晌廳睏直至第二日(去camp第三日)離開。

當上左船之後其中一個女仔佢就講左佢幾恐怖既說話.....

Queenie：我頭先上房執番D野走果陣，我見到牆上面痴左好多條長頭髮晌度..............

大家聽完都嚇到死..........

[本帖最後由taro 於2007-10-415:15編輯]