同哈利波特爭女 基仔張秋倫敦調情最近古巨基為新碟影封套及拍攝MV ，專程遠赴歐洲多個國家；其中在英國倫敦一站，一向是《哈利波特》迷的他即時諗起在《哈利波特鳳凰會的密令》中，與哈仔嘴到開花的港產張秋。
曾經被網民選為最似哈利波特的藝人，基仔當然想好似哈仔一樣，可以一親張秋，於是唱片公司便聯絡身在倫敦，飾演張秋的梁佩詩，對方爽快一口答應，在基仔新歌《愛回家》MV 中做女主角，兩人在倫敦當眾調情。
超支十萬
《哈利波特鳳凰會的密令》在世界各地開畫票房都破紀錄，哈仔更獻出處男之吻，與今年十九歲飾演張秋的梁佩詩（Katie ）錫足三十秒，嘴到開花一幕，成為戲中焦點所在。
一直是《哈》迷的古巨基，見偶像Daniel Radcliffe 咁好艷福，於是有樣學樣，搵張秋擔任新歌《愛回家》MV 女主角。為了遷就Katie 檔期，避免撞正她要在六月中會合哈仔做電影宣傳，拍攝大隊要臨時改變行程，提前到倫敦，為此令製作費超支近十萬。
雖然Katie 的父母都是香港人，但自細在蘇格蘭長大的她，廣東話始終有限，拍攝前，她的母親講明Katie 唔識中文要用英文溝通，但拍到中途，同大家開始熟落後，她開始慢慢用廣東話同基仔溝通，由於有唔少親戚都住在香港，經常有機會返香港探親的她因而學識少少廣東話。
出手護花
拍慣超級荷李活大製作的Katie ，對於首次拍港式MV ，覺得好好玩。「之前拍電影通常響studio ，一日可能都係拍一場戲，但今次一日之內要走幾個location ，好多嘢都好快好趕，我覺得好得意。」
除了得意，還有刺激。攝影隊在Covent Garden 拍攝期間，突然殺出一名揸住啤酒鬼佬搗亂，當見到基仔同Katie 埋位拍戲，就故意走埋二人身邊大叫，又在鏡頭前擺pose 搶鏡。由於事出突然，Katie 表現得無助又不知如何是好，但在香港同大陸見慣突發場面的基仔就淡淡定，叫Katie 藏身電話亭，他自己就企在電話亭外把守，等醉酒鬼佬離開，無事先繼續拍攝。
補拍kiss 戲
基仔雖然身為導演，但他卻未有自製機會加一場好似哈仔一樣的嘴戲，他說：「係喎！漏咗添，不如返去補拍番。講吓笑啫，個故事係講我同Katie 兩個人好有緣分，經歷好多次邂逅而認識，唔通啱啱識就kiss 咩！」
卅四歲的基仔與年僅十九歲的Katie ，年紀雖然相差一大截，但基仔自覺與對方好合襯，「好彩我keep 得好，外形都合襯，同埋佢比起上一集（《火盃的考驗》）時大個咗同靚女咗，所以都OK 嘅。」
哈利情人
在英國蘇格蘭長大，今年十九歲的梁佩詩（Katie ），父母都是香港人，○四年她參加《哈利波特》選華裔少女試鏡，結果憑住有蘇格蘭口音的英語，擊敗三千九百七十二人，成為哈仔初戀情人張秋。在戲中她奪去哈仔的初吻，結果惹來哈利的fans 極度不滿，被網民惡意抨擊。
Katie 九月將入讀大學，與此同時，她亦有份參演即將開拍《哈利波特》第六集，另外更有消息指她將會取代章子怡，拍攝由唐季禮執導的《花木蘭》。
張秋與哈仔這場嘴戲，足足NG 了三十次才完成。
已是國際明星的Katie ，今次肯幫基仔拍MV ，原來是因為她的父母都係基仔歌迷，所以基仔叫到一口就答應。
最初Katie 相當怕醜，但拍到中途與基仔開始熟落，坐旋轉木馬時，玩到拗腰。
痴漢騷擾︰有大陸遊客捉住基仔影相，一名鬼佬即上前搗亂。
