出血10個鐘 李蘢怡狂野紋身曝光在香港樂壇銷聲匿跡一年的李蘢怡，今年初忽然離港赴美，一住數月。返港後，她的身上多了一個一呎巨型蓮花及雀仔紋身，誇張程度，是香港女歌手從未有過。李蘢怡直認不諱，更不介意將位於背脊的大紋身公諸於世。「預咗會俾人知。我紋完身後，第一時間打長途電話話俾媽咪知，因為我唔想佢第日響報紙雜誌睇到先知道。」
紋身的圖案純粹個人喜好，李蘢怡說蓮花象徵潔淨，雀仔代表個人，用以警惕自己不要再犯錯。
捱痛出血十個鐘，吃盡苦頭換一世記憶，肯定唔係人人肯制。
痛到入心
○二年出道至今，李蘢怡（Tiffany ）令人印象最深，莫過於其有料身材。本刊記者收到消息，指Tiffany 早前在美國秘密為其36D 身材進行加工工程；唔係隆胸抽脂，而是在其滑溜玉背上，紋了一個高達一呎的蓮花及雀仔圖案，由背脊伸延至股罅上端。
被踢爆加入「公仔妹」行列，李蘢怡未有反應激動：「其實去美國之前，我一路都想去紋身，響美國，紋身根本好普遍，就連阿婆都會去紋身，無乜大不了！」紋身十個鐘，Tiffany 全程裸上身，但她強調幫她紋身的師傅是女仔，仲要係中國人。
Tiffany 承認，像她一次過完成如此大型紋身圖案的女性並不常見，連紋身師傅亦讚她膽識過人。
「要一次過紋咁大個圖案，真係好痛，特別係隻雀仔部分，紋正響尾龍骨，因為嗰度神經線多，特別痛到入心。我不停嗌，一係食糖頂住。要捱痛十個鐘，另外等啲皮膚結焦都要三個禮拜，但我覺得好有意思，決定紋身要承擔，過程要捱痛，經過今次經驗，我真係覺得自己硬淨咗。」
一生一世
紋身一生一世，難道Tiffany 不怕將來後悔？
「所以我決定選擇一個永遠都覺得有意思嘅圖案，唔會隨住時間覺得out ，我好鍾意蓮花，感覺好乾淨，我嘅意思唔係話自己無做錯過，只係想藉此盡量提醒自己，避免犯錯，起碼要做一個敢做敢認嘅人。」
美國習舞
不過，Tiffany 強調，早前她離港留美四個月，真正原因不是為了紋身，而是在當地學跳舞。為求個人增值，花了數十萬元學費及生活費，為未來投資。
「以前（○五年）自己太投入拍拖，直至同男友分手，又遇到公司大地震，雖然好唔順利，但呢段時間反而令我有空閒諗通好多嘢，覺得自己無理由就咁拍拖、結婚就一世；根本未盡力做過一件事，以前就算唱歌，自己根本唔夠努力。今時今日，做藝人要全面，既然我一路都鍾意跳舞，就要be professional ，所以揀咗去美國學跳舞。返到香港，我亦有繼續跟老師學無偷懶，依家唔跳一日都唔舒服，我會一路跳落去，因為機會係只會俾隨時ready 嘅人！」
成功解約
去年一度傳出Tiffany 和公司漢傳媒鬧不快要求解約，事件經過一年多冷凍期，原來雙方已在今年五月和平分手。
「我○二年一出道就同StarEast 簽咗八年約，之後就無再簽任何新合約，即使公司因為有新財團加入，改名Star J ，以至後來嘅漢集團，大家其實無太大摩擦，只係自己想換新環境，試吓其他新嘢，所以諗住唔簽新約，當時我同公司一個好朋友講過自己嘅計劃，點知我都未同公司傾件事已經通天，因為咁令我同經理人文迪有咗唔少誤會，後來，我同經理人開心見誠坐低傾番，佢哋都好支持我嘅決定！」
唔想再錯
成功解約，已經回復自由身的Tiffany ，亦一路有新經理人公司向她招手，但再簽新約，她承認會諗清諗楚。
「其實，呢幾年自己都好似盲頭烏蠅咁，公司安排做乜就做乜，依家我總算搵到一個方向，就係要做一個識跳舞嘅歌手。其實好多謝舊公司肯體諒我，仲有叻哥（陳百祥），我記得問過佢我如果唔簽約，佢會唔會嬲我，佢反而鼓勵我話：『傻女，你都咁大個，應該自己選擇自己嘅路！』自己好幸運，但我明白唔係必然，要重新出擊，充實自己最緊要！我唔想再行錯一步！」快將廿五歲的Tiffany 一臉肯定。
次次出位
李蘢怡○一年參加周星馳電影《少林足球》試鏡，無俾星爺揀中，反被阿叻（陳百祥）簽約StarEast 。模特兒出身的她後轉職歌手，出道至今，是非不絕。
拒絕應酬
傳聞蕭定一加入漢傳媒後，偏幫女友李彩華而冷落唔肯應酬的李蘢怡，直至蕭定一離開漢傳媒後，Tiffany 亦因拒絕轉會被攻擊，不過，大膽的Tiffany 就力抗惡勢力，更揚言：「佢敢搞我？」
玩gimmick
○五年八月與李龍基合唱《明天你是否依然教我》，是講她多怨言，做人很有「火」，所以由李龍基這位前輩來教她做人的道理。不諱言全是她的心聲，揚言全情投入工作，決心戒除惡習。
「波大無腦」
自○三年尾與男友Chris Kong 拍拖便無心戀戰，暴肥甩底推job 乜都齊，得罪老細，激嬲經理人阿叻同志偉。還要母親津貼瘟仔使費，全心全意為愛情，甘心放棄做性感女神朱茵接班人機會，到被男友「飛起」後才醒覺，聲稱會「生性」，重新投入工作。
公司爭寵
○二年八月陳文媛（BoBo ）和李蘢怡（Tiffany ），因經理人和唱片公司均同屬東方魅力（StarEast ），故不時有傳二人為爭寵而不和，亦有報導指東方魅力大細超，谷李蘢怡攃陳文媛，成為二人不和的導火線。
愛紋身
近年紋身已成為「潮人一族」的潮流指標，同時亦是愛侶的「定情信物」，在娛樂圈亦有不少藝人愛紋身，更不介意公諸同好。
至激型樂基兒
自小在美國長大的樂基兒，十五歲便愛上紋身。她曾向傳媒透露自己高峰期身上有五處紋身，包括耳背的玫瑰、大腿的鬼馬BB 、手背的小海馬圖案、乳暈的蝴蝶以及右臀的性感標記朱唇。玫瑰紋身是與黎明在○五年尾熱戀時所紋，而鬼馬BB 亦是早年與陳平治拍拖的印記，但成為「黎明嫂」後，○六年九月，她以激光將此紋身除去，以表自己對黎明死心塌地。
純情型衞蘭
出道兩年給人鬼妹仔性格的衞蘭，十四歲年紀輕輕已走去穿眉環，現時身上總共有九個洞及三個紋身。衞蘭在演唱會中亦大晒身上的三個紋身，當中包括右邊腳踝有一個SnowFlake （雪花）圖案；而最受注目是紋在左背上的獨角獸圖案，象徵貞潔和禁慾的意思。
纏綿型張栢芝
愛得轟烈的張栢芝，為了霆鋒而紋身，包括左邊背脊的樹葉狀圖案、右腳眼的CCN 及左邊腳踝內側的荊棘圖案，此外左邊腰間及左邊近股位置亦各有一個紋身圖案。她喜歡將愛人名字紋在身上，當中以○二年的CCN 字樣最為經典，代表（Cecilia Cheung ）和霆鋒（Nicholas ）。而○五年與老外Jeroen 熱戀時，亦被發現左腳內側紋了一個J字圖案。藉紋身以表愛意，作為予對方的「定情信物」。
藝術型盧巧音
型人代表，算係較早一批紋身女藝人。她的第一次紋身是在右邊手臂近肩膊的倒三角荊棘圖案，及後有頸後的梵文圖案、雙手手腕的閃電，另外肚臍和腳眼亦有紋身。最近她又在手臂內側紋了藏文，據稱可保平安。
真空期
二十歲簽約StarEast 八年，李蘢怡便因為身材出眾力壓同公司的陳文媛，更簽約修身堂首度著泳衣一鳴驚人；不過，○三年因為拍拖無心戀戰，事業一敗塗地。一年後與男友分手，又遇住公司人事變遷，StarEast 因新財團加入改名Star J 及漢集團，新人事新作風令Tiffany 發展被膠住，未有像E-Kids 、EO2重新簽約的她，一年多以來一直工作量不多，與公司合約拉鋸多時，終在今年五月成功解約，回復自由身。
去年2月，Tiffany 和李彩華同場無偈傾，之後傳出不和。（《忽然1周》圖片）
學舞令Tiffany 自信增加，更成功瘦身，難怪她說：「我會一路學落去！」
習舞半年，這些拗腰動作只算 熱身。
紋身佔據了半個背脊，感覺相當震撼，原來過程亦刻骨銘心。
赴美學舞期間，Tiffany 跟當地著名老師Wade Robson 學跳Hip Hop 。
