由參賽第一日開始，大家對英格蘭奪冠都不抱期望，直至佢哋小組出線、16強、8強，一路過關，專家們仍然唔睇好英格蘭奪冠，心裡面都係嗰句：「贏到XXX先算啦！」好嘞，依家入到世界盃4強，各隊奪冠機會應該係1/4，即係25%，但英格蘭再次被睇低，奪冠機會只有18%。
國際著名數據公司OPTA利用大數據分析出各隊奪冠機會，法國以41%排第1，由於法國被一面倒睇好，其餘3隊奪冠機會都低於25%，4強與法國碰頭嘅比利時排第2，奪冠機會只有21%，至於下線兩隊都被視為機會較低，克羅地亞只有20%，英格蘭機會最低，只得18%。
不過馬會足智彩奪冠賠率，同呢個數據分析就有啲出入，賠率由最熱到最冷順序為法國(2.8)、英格蘭(3.25)、比利時(3.5)及克羅地亞(5.5)，如果計埋數據分析嚟睇奪冠機會，法國係最抵捧，英格蘭就最唔抵捧。
英格蘭似乎都係不被期望好啲，冇期望就冇失望，英格蘭最怕係畀人吹大咗，不被期望之下殺入4強，保持低調或者畀到大家超級驚喜呀！
http://football.on.cc/cnt/news/newe/index.html?articleId=bkn-20180710012024970-0710_00882_001&whichpage=1
