【飲食籽：故味重嚐】
親手製的懷舊中式糕點已經少之又少，但在元朗「大榮華酒樓」旁邊的小巷中有遠近馳名的「明星茶果店」。
夫妻同心，其利斷金。在元朗大榮華酒樓旁邊的小巷中，就有着這個動人的愛情故事。土生土長的元朗圍頭人黎彩群（群姐），嫁給同樣在元朗長大的陳裕昌（昌哥）。十多年前，原本在製衣業做裁紙樣的昌哥毅然與群姐創業，「嗰個年代製衣業式微喇，仲邊有得做？」昌哥感嘆說。「奶奶識整茶果，不如跟佢學做吧。我哋讀得書少，茶果又唔係太多人識做，識做嗰啲阿婆都老喇，驚會失傳。橫掂自己奶奶識做，點解唔跟佢學，傳承呢門手藝呢？」群姐笑說。於是13年前他們租了一個地方做茶果，再拿去街市小攤檔賣，除鹹甜茶果外，還有雞屎藤、缽仔糕及圍村傳統界糕等。後來租了一間茶餐廳前的小角落賣糕，遠近馳名。
招牌馬蹄糕平日是散裝一件件買，用料十足，馬蹄非常爽口，農曆年會有一斤半裝的發售，$88。
老闆娘撐唔住 阿女女婿幫手重開
店名明星茶果店的明星兩字，原來是群姐的花名。「細細個住圍村有人入嚟拍戲，見我個樣得得意意，咪問我做唔做明星囉，哈哈！明星明星，一叫就幾十年，喺村度一叫『明星』，就知道講緊我㗎喇。」不過開店九年後，群姐的身體開始撐不住，「膽固醇高，又肩周炎，醫生要我唞吓，做多啲運動，惟有停吓先喇。」於是她忍痛退下火線，結束第一代的明星茶果店，但期間不停有街坊熟客問她何時重出江湖，說再找不到同樣的味道。群姐和昌哥做茶果的心癮仍在，四年後就決定重開明星，但這次還有新人加入，「女婿話想學做茶果，阿女又肯幫手，咁就好喇，冇咁辛苦。」
於是群姐將來自奶奶的上一代傳統手藝，傳承到女婿手上。去年1月1日，明星重開，由陳氏家族一手一腳經營，昌哥負責炒餡蒸糕等粗重工夫，群姐負責包糯米糍、捲芝麻卷等精細工作，女婿從旁協助，邊做邊學，女兒就管舖面。長方形的新舖位面積非常細，一家四口擠在約100呎的舖中仍合作無間，「一家人合作真係好開心！雖然賺唔到大錢，但一家人圍威喂完全唔悶，電視收音機完全唔使開，傾住偈咁做，好快就一日。」群姐邊包糯米糍邊說。不過她和昌哥偶爾也會有意見不合的時候，「做嘢一定有拗撬㗎喇，我話得，佢又話唔得。但平心而論，都係為啲嘢好食，咪慢慢遷就囉，兩公婆拍住上，夫妻同心其利斷金呀！」
心機之作芝麻卷 防倒汗水要逐碟蒸
他們堅持的還有「每日新鮮即製」。「我哋每日五、六點就要返嚟蒸糕包糯米糍，整完一樣整第二樣，邊出爐邊賣，賣晒就再整過，最緊要係新鮮！」因為舖位太細沒有足夠位置容納大鑊，昌哥要前一晚在家做定炒餡等材料的預備工夫，隨時做到深夜才能休息，「初頭做到好辛苦，覺得攰到想放棄，但做做吓又多人認識，有啲成績，都好開心，就覺得要堅持。」群姐續說，「人哋話你哋啲嘢食好味，第二度搵唔到，就覺得幾辛苦都係值得。」採訪當日，看到很多街坊是專程來買缽仔糕及茶果等，但因全部人手做，每日最多只能做二、三百個，售完即止，不少人也失望而回。而群姐去年暑假才推出的芝麻卷，更是心機之作。芝麻是找相熟的店家磨，每磅來貨價也至少要$50。為防倒汗水及厚度不平均，要逐碟蒸，待放冷後以人手捲製，每碟只能做四條，非常花時間。臨近新年，他們也特別推出馬蹄糕、馬豆糕及蘿蔔糕等三款糕點。為確保新鮮，會在客人取貨日的早上或前一晚才製作，每日最多做300底，「今年係第一年一底底咁賣呀，之前唔敢做呀，邊有人手，有阿女同女婿幫手，先至敢接咋，預咗年三十前幾晚通宵㗎喇，哈哈！」不過，群姐說多辛苦也不怕，因為農曆新年他們決定放自己一個長假，初十二才會啟市，先苦後甜。
芝麻卷中間仍保留有芝麻醬，芝麻的份量要十足外，蒸的火候及時間也要控制得宜，非常有難度。每條$6
蘿蔔糕的白蘿蔔刨成條狀，有嚼頭，鹹度又適中。一斤半裝，$98
坊間較少有賀年的馬豆糕賣，加入椰汁及花奶製成，香滑清甜。一斤半裝，$68
承傳自奶奶的蘿蔔茶果，鹹香惹味，深受街坊歡迎。每隻$6
舖頭面積只有約100呎，只擠得下昌哥（左）和群姐。
明星茶果店元朗泰衡街2號地下B舖
如果您喜歡這篇文章，請按「讚」或分享給您的朋友，以示鼓勵。
