（左起）劉德華、尚連奴、張靜初同馮德倫之前喺歐洲拍《俠盜聯盟》外景。
劉德華監製兼主演、馮德倫（Stephen）執導嘅新片《俠盜聯盟》，今個周四喺香港上映，賣點之一落喺飾演俠盜之首嘅華仔身上，同擔任警探嘅國際影星尚連奴（Jean Reno）連番鬥戲。
劉德華同尚連奴（左）對戲笑笑口好輕鬆。
擦出新火花
華仔日前接受訪問，講到同尚連奴首次合作嘅感受，佢話：「尚連奴係一位出色而真誠嘅演員，合作過程非常舒服自然，仲可以透過今次嘅機會，了解到其他國家演員嘅表演文化。」而尚連奴就形容今次同華仔合作係「一場棋逢敵手的網球對決」，華仔大表認同：「我哋嘅演技交流，就好似網球賽球來球往，希望可以擦出新火花。」
戲中二人身份對立，華仔話當中喺練靶場嘅鏡頭最難忘：「因為嗰場戲需要一個鏡頭到尾，無論對白節奏同對鏡頭嘅掌控都要絲毫不差，所以同尚連奴不停咁排練，而每次大家嘅即興發揮又可以有新嘅衝擊。」《俠盜聯盟》其中一個拍攝外景地方係布拉格，舊地重遊嘅華仔話：「今次開工冇乜時間去玩，只係借啲私人時間出去偷閒咗一陣，好感謝認出我嘅途人畀我私人空間，可以放鬆一下。」
撰文：馮仁昭
from:
http://hk.apple.nextmedia ... 170821/20127533
