美麗準媽媽胡杏兒懷胎八個月，提到下月底囝囝出世，難掩一臉幸福。
【我的美麗孕記】現年37歲的胡杏兒，今年初成功懷孕，為沙頭角圍村老公李乘德（Philip）陀着慈姑椗，奶奶錫到燶不停煲靚湯，杏兒陀得開心，有意追多兩個，湊夠三個才收工。下月底預產期的杏兒打算順產，但卻擔心會痛到發癲，坦言：「唔知自己捱唔捱到。」
胡杏兒與圍村老公李乘德前年結婚，今年5月母親節宣佈懷孕四個月，預產期為下月底。正當大家都心急想知杏兒腹中塊肉性別時，Philip日前就自爆太太一索得男，杏兒未生已計劃40歲前追多兩個，生夠三個。
陀B已八個多月的杏兒，體重增加了二十多磅，她日前接受訪問時說：「好多人都話我個鼻大咗，個樣有啲唔同咗。」臨盆在即的她開始心情緊張：「都開始有啲驚，因為我想順產，啲人話順產復原得快啲，但我未試過，一生人都未經歷過嗰種痛，唔知自己捱唔捱到，因為朋友都話會痛到發癲、痛到會暈，所以都有啲驚。」
胡杏兒陀仔期間特別注意飲食，戒吃肥膩食物。
胡杏兒昨在Ig貼出大肚泳衣照，力谷節目《胡說八道真情假期》。互聯網圖片
胡杏兒夫婦早前舉行baby shower，開心迎接兒子出世。資料圖片
囝囝似打觔斗
囝囝在肚中非常活躍，杏兒說：「有時個肚會摸到一嚿嘢，唔知手定腳，爸爸有時會摸吓佢。BB成日郁，係咁踢我，直情好似喺入面打觔斗咁，郁到我要問醫生：『佢郁得咁緊要，係咪有問題？』醫生先話BB郁得多係好事。」杏兒表示陀B不算辛苦，一直有繼續工作，早前還與「胡說八道」好姊妹到澳洲拍攝無綫節目《胡說八道真情假期》。
杏兒分享美麗孕記，她說：「其實頭三、四個月係最辛苦，我喺無錫拍緊劇，成日發冷，成日想嘔，冇乜胃口。到四、五個月就穩定咗，想食吓嘢，嗰段時間係最舒服。到咗𠵱家第三個階段，又開始辛苦，因為BB重，我就瞓得唔係好好，同埋唔會暴飲暴食，唔想畀佢太大隻，因為生出嚟好難生。」Philip是沙頭角禾坑村客家原居民、三代單傳，這次杏兒成功為夫家陀慈姑椗，囝囝將來會有丁權。
李乘德是圍村原居民，將來兒子也有丁權。資料圖片
胡杏兒於06年拍攝《肥田囍事》時，刻意兩個月內增肥逾四十磅。劇照
收身全靠毅力
很多人都擔心產後收身問題，不過杏兒曾於06年拍攝無綫劇集《肥田囍事》時為「肥田」一角，刻意在兩個月內增肥超過四十磅，拍完後兩個月又火速減肥，所以她並不擔心：「我都試過增肥、減肥拍劇，只要付出努力，肯去做運動就一定得，呢樣嘢係毅力。」
孕婦情緒波動大，杏兒表示幸好得到老公諒解：「老公有留意我情緒，我都發覺有時會突然好down，佢都有提醒我，叫我：『喂，你唔好諗埋一邊，自己走咗入個窿喎！』」她希望至少生兩個，但三個都沒所謂，她說：「我希望唔係好痛，唔好有陰影，一個好悶，如果冇嚇親，會生三個。」
採訪：林妙萍
攝影：郭賢興
from:
http://hk.apple.nextmedia ... 170930/20168277
