從未被封過做樂壇天后的趙學而，等了22年才舉行兩場處女騷「我趙學而演唱會」，首場騷開賣時僅6分鐘被秒殺，前晚終於在九展揭幕，學而以日式歌姬look登場，惟唱完《難懂》後想說話卻咳了一咳，學而打趣自嘲：「好明顯我畀口水濁一濁，真係『自濁位』。」
趙學而聽到觀眾起鬨要求她唱《皆大歡喜》主題曲，大叫「黐線」。
趙學而（右一）因當年演出《皆大歡喜》林玉露一角，為她帶來人氣。資料圖片
「遲到好過冇到」
學而感慨說：「喺娛圈活咗20幾年嘅第一個演唱會，有時啲嘢遲到好過冇到呀。」她在個唱上兩度爆喊，當演繹完《你是你本身的傳奇》後，邊說邊喊：「多謝過往自己人世間經歷，每次唱呢首歌都喊，人生經歷高低起跌，我一世好似活咗七世咁。啲人成日覺得我好惡、好煩，其實我好易喊，係喊包。」
此外，學而唱出《輸給戀愛的女人》首段後，突然說：「不如嚟過啦，我唔好！啲歌改過曬編曲，年紀又大，又唔好記性！真係好大壓力㗎！呢度又多人，好似好分心咁，做live係咁㗎啦，唔得咪再嚟過囉！」
怎知重唱時再重蹈覆轍，學而𤷪𤺧說：「黐黐哋㗎我真係，發台瘟！」阮兆祥即大聲安慰：「唔好嬲，飲啖水先。」觀眾都鼓勵：「實得㗎！」、「我哋唔趕時間！」學而嘆氣：「我都知唔趕，我都知實得㗎，咁𠵱家唔得嘛。」幸好唱第三次時終順利完成，全場拍掌。
鄧兆尊左右逢源，帶兩女友車釐子（左）和Carmen（右）睇騷。
阮兆祥帶女友到場支持學而，更帶頭叫學而唱《皆大歡喜》。
拒唱《皆大歡喜》
最後學而踢拖出場，當年合演劇集《皆大歡喜》的阮兆祥、廖碧兒和鄧兆尊都在座，兆尊更帶兩位女友到場。祥仔大叫學而唱劇集同名歌，觀眾加入起鬨，學而說：「開賣6分鐘，就係為咗聽《皆大歡喜》？黐線㗎！呢個世界好亂呀，媽！」觀眾再尖叫，學而終就範：「拖鞋十字步，Hey呀Hey呀Hey！呀Hey呀Hey！唱咗兩句啦，你哋好抵㗎喇！」
採訪：盧妹
攝影：陳俊強
from:
http://hk.apple.nextmedia ... 161115/19833576
