吳國敬與趙學而相識十多年，雖二人共同興趣不多，但熱愛音樂的他們卻無所不談。阿敬更首次公開表示學而是心中「最唱得女歌手」五強之一，大讚對方錄音冇得挑剔；學而就指阿敬為人冇戒心，故鬧出不少搞笑事，阿敬即自爆曾被冠以「撞板蟲」花名。
趙學而欣賞吳國敬腦筋轉得快，做事有計劃。
撈過界有「翻唱命」
吳：吳國敬 趙：趙學而
吳：我記得嗰陣同你合作之後，有個樂手朋友問我有冇歌畀你，我即刻話有，仲要一快歌一慢歌！
趙：係呀，嗰陣我啱啱續約飛圖，應該係1996、1997年嘅事。
吳：喺我第一次轉做幕後，亦算係我嘅低潮期，嗰段時間媽咪喺美國撞車過身，我成個人冧檔，之後又冇咩心機，唔想再做幕前，就揀咗去做作曲，不過我寫畀你首《有效日期》就係度身訂造。
趙：而《Take2》就好係你嘅風格，聽demo時我已經好鍾意，奈何我嘅聲線唔係好襯rock。但我記得同你熟係因為有段時間，成日一齊唱K，因為我哋有共同朋友，所以成日一齊食飯，同埋我哋又曾經住得好近！
吳：冇錯，其實我好欣賞你唱歌，你係拍劇之後轉去唱歌，好坦白，當時做電視人轉去唱歌我哋會藐，因為會覺得撈過界，但之後發現你超唱得喎，再畀咗首《意氣用事》你，好開心你把靚聲配合到落首歌度，令隻歌昇華咗！
趙學而翻唱別人的歌，被讚比原唱者還好。趙學而最近推出第四張發燒碟，仍抱着做靚音樂為原則。
吳國敬自認烏龍，經常撞板。容祖兒和衞蘭都被吳國敬視為唱得的女歌手。
容祖兒
趙：首歌出街後，你真係讚不絕口，你都係性情中人，講嗰刻個樣好激動，我好深刻！
吳：我自己作嗰陣唱demo都唱到甩肺，好難唱隻歌，但同你錄音，見到你唱得好輕易，我聽番都打冷震！
趙：其實唱呢首歌之前有個老師教我少少嘢，嗰個係蔡立兒，我畀過佢聽，之後佢同我講邊度可以唱得再好啲。
吳：我都唔知呢件事添，不過有啲人會話你有翻唱命，因為翻唱親啲歌都畀人讚得好犀利，我覺得咁都係好事，證明不比原唱差！
趙：其實我都唔介意畀人咁講，都接受o架。
吳：你仲係我心目中「唱得女歌手」五強之一，你嘅音準好勁，拍子好穩定，另外我嘅心水仲有容祖兒同衞蘭。
趙：我之前都未聽過你咁讚我！
吳：你唱歌真係冇得挑剔，我同你錄音都覺得好歎，因為唔使點執淨係坐喺度聽，又冇乜嘢鬧到你。
聲援「撞板蟲」開騷
趙：依家諗番，我哋兩個都冇咩百厭嘢，每次都係搵好嘢食，我又唔打麻雀，又唔賭馬。
吳：我哋就係咩都傾到！
趙：但我知你都有好多烏龍嘢，哈哈！
吳：係呀，有段時間仲有個花名叫「撞板蟲」，因為成日撞板，撞得好犀利。
趙：你個人特別多笑料，可能因為你比較隨意，好直，諗到咩就講，好彩我哋班朋友易接受意見。
吳：識咗咁耐，其實你最欣賞我啲咩？
趙：你腦筋轉得好快，不論做人或工作方面都係，好似你頭先講做幕前覺得唔舒服，就轉去做幕後，好撇脫，而且自我人生計劃好叻，可以閉關兩、三年去寫歌，好堅定，真係夠貨先會出嚟。
吳：哈哈，但我個計劃好長，係work hard兩、三年，跟住play hard兩、三年！
趙：依家喺香港要搵到人可以好似你咁，其實好難，有陣時要啲人放一星期假都好似唔得咁，但當你離開去玩，可能又會有唔同嘅體會，我都覺得你好有勇氣。
吳：當你決定閉關兩年、玩兩年，你就要花更多心機去分配時間，但係話時話我嚟緊開騷你幫我唱咩歌先？
想開作品展
趙：未諗呀，你打嚟搵我做嘉賓已經一口答應，識你咁多年，見你開騷都好開心，朋友一定要撐，而且你有咁多好歌，係值得欣賞嘅人，我哋義氣仔女，幫到一定幫，到時一定要唱你寫畀我嘅歌。
吳：咁有冇啲其他我寫嘅歌而你又好鍾意先？
趙：我鍾意《我們的主題曲》，覺得好sweet！
吳：咁你就唱呢隻啦！
趙：好難唱㗎，唔好啦……
吳：你得嘅，或者唱盧巧音首《代你發夢》，我之前仲諗過開個作品展，你負責唱女仔歌，我負責唱男仔歌，可行o架，幾刺激！
趙：咁音樂上合作都可以好多元化，有好多唔同嘅形式可以去做，依家就咁講都好開心。
發燒碟重品質
趙學而最近推出第四張發燒碟，原來阿敬亦有意推出，他說：「本來係計劃出發燒碟，但之後突然有好多嘢殺出嚟，所以就搞咗演唱會先。」阿敬並大爆學而的發燒碟張張賺錢：「佢隻隻碟都賺，而且每次嘅成本都愈嚟愈高！」學而亦謂出碟最重要是音樂品質：「內容好重要，我情願做靚嘅音樂，畀大家聽到高品質嘅音樂。」
From:
http://orientaldaily.on.cc/cnt/e ...0310/00282_055.html
