為咗宣傳今晚播出嘅《有倉出租》第四集，河國榮日前喺上水站彈結他冧袁嘉敏。
九龍灣迷你倉今年6月發生四級大火，導致兩名消防員殉職。意外發生後，港台即時停播以迷你倉作故事背景嘅處境劇《有倉出租》，直至上月24日復播，重播番頭三集。至於河國榮同袁嘉敏孭飛嘅最新一集第四集《漂泊的豬頭》，今晚會喺港台31首播。
今集袁嘉敏飾演走水貨豬肉嘅水貨客，河國榮就做貨車司機，兩人因為走水貨而撻著。日前袁嘉敏一身水貨客裝扮同河國榮喺上水站拍攝《有》劇宣傳片，佢哋仲喺站出面唱情歌，夠曬浪漫。
袁嘉敏劇中因為走水貨而同河國榮撻著。劇照
河國榮經常幫袁嘉敏搬貨。劇照
袁嘉敏一身水貨客裝束加埋一部手拉車，入型入格。
開工首日中暑
袁嘉敏話河國榮喺劇度經常幫佢搬貨，所以兩個人產生咗感情。河國榮就話：「我哋都好夾，第一日埋位就要喺貨van後面互相餵對方食飯。其實呢場戲幾難做，因為唔想太老套，想出嚟感覺新啲、得意啲，希望大家睇得出啦。」原來袁嘉敏首日開工已經中暑：「嗰日我哋喺上水拍嘢，要不停搬嘢，加上好曬，搞到我中暑。不過佢（河國榮）好好，我背脊濕曬，佢仲叫我埋去陰涼位置坐嚇。」河國榮又大讚袁嘉敏濕𣲷𣲷嘅背脊好性感㖭。
撰文：馮仁昭
from:
http://hk.apple.nextmedia ... 161114/19832636
