受內地限韓令影響，古仔喺新片《貪狼》無緣同韓國演員合作。《殺破狼II》劇照
內地突然實施限韓令，令到好多娛樂公司措手不及，太陽娛樂原本呢個月喺韓國開拍《殺破狼》前傳《貪狼》，導演係葉偉信，主角係古天樂加張晉，有幾位韓星演出㖭，投資約1.5億人民幣，但受到限韓令影響，電影公司已取消去首爾拍攝，所有韓國演員都唔會用啦！其實近年韓星嚟到中港台三地搵銀，越嚟越大牌，畀咁多錢佢哋，仲要受佢哋氣，𠵱家俾內地咁樣壓一壓，唔係壞事。
黃柏高因為《殺破狼II》收得，決定再開拍前傳《貪狼》。資料圖片
最遲10月中開拍
聽講《貪》片會改去泰國拍攝，噚日馮仁昭問監製黃柏高（Paco）係咪因為限韓令而取消去韓國取景？佢喺電話度話：「係呀！𠵱家決定轉去泰國拍，原本有幾位韓國非一線嘅演員演出，𠵱家都會換人，因為變動咁大，又要重新搵過啲景，真係需要時間準備，希望最遲下個月底或10月中可以開拍啦！」
到底《貪狼》故事究竟講乜嘢？聽講係講古仔演嘅黑幫老大出獄後俾張晉劫走。因為古仔啲血液好獨特，可以高價販賣，所以張晉想將佢賣畀泰國富商做活肝臟移植，但兩人坐船途中出意外，分別流落到泰國，之後兩人就喺泰國展開一段你追我逐嘅公路之旅。
撰文：馮仁昭
from:
http://hk.apple.nextmedia ... 160811/19731142
