賭王何鴻燊與四太梁安琪所生的長子何猷亨，去年戀上大台小花、「宅男女神」陳瀅，二人相戀半年多，起初熱戀甜蜜蜜，陳瀅得到四太開綠燈融入家中，更獲加持齊齊去睇麥當娜演唱會，有望做賭王新抱仔。不過近月已沒見二人糖黐豆拍拖，昨日有報導指猷亨兩個月前已主動跟陳瀅分手，女方力挽狂瀾想箍煲但不果。近日更有指她與大台藝人張振朗因拍劇合演夫婦而熟絡，張振朗雖已有女友，但知道陳瀅甩拖即獻慇勤，撐枱腳食早餐又送消夜。
有指分手原因是26歲的陳瀅與細她3歲的猷亨拍了拖幾個月，已主動逼婚，又愛管男友，皆因她來自破碎家庭，她疼錫的外婆年紀大，故想早點結婚組織家庭生B。而猷亨忙於打理家族生意，經常澳門及香港周圍飛，故二人已確實進入冷靜期，而陳瀅亦努力箍煲中
何猷亨與陳瀅熱戀時，2月曾糖黐豆去嘉年華玩掟公仔。
陳瀅曾跟四太一家去睇麥當娜演唱會，新抱仔地位獲肯定。資料圖片
張振朗早前和陳瀅合演夫婦，被指拍劇後依然向女方大獻慇勤。資料圖片
屋企人最緊要
問到分手一事，身在加拿大的陳瀅昨日透過經理人以短訊回應：「我嘅感情事就唔係好像報導一樣咁講，只係想低調點，可能因為我少提到感情令大家有揣測，而現時我們都處於工作搏殺期，大家都是成年人有共識專注工作，我𠵱家喺加拿大的婆婆身體都有少少好轉，我覺得現時最重要的係屋企人。」本報昨日曾致電猷亨，他表示忙開會，截稿前未有回覆。
讚拍檔有風度
另外，陳瀅表示與張振朗只是同事關係，大讚他gentleman及好拍檔，而張振朗亦否認追對方：「嚇？唔係，唔好玩啦！」問他是否拍完劇依然以老公老婆相稱，他說：「我未睇新聞，睇咗先講啦！」
採訪：唐心悠
from:
http://hk.apple.nextmedia.com/entertainment/art/20160714/19693472
