女人四十仍然可以是一枝盛放鮮花，45歲辣媽鍾麗緹（Christy）經歷過兩段婚姻，且有三個女兒，但去年在內地真人騷《如果愛》跟年輕12載的內地男星張倫碩撻著，前日更獲男友跪地求婚，Christy開心得直呼「我願意」！她指之前兩次結婚也沒機會穿婚紗，今次定要穿婚紗及大搞，更興奮說：「我覺得好幸福呀！」
鍾麗緹經歷過兩段婚姻，先後為兩任丈夫生了三個女兒，去年與年輕12載的內地演員張倫碩，拍攝第二季內地戀愛真人騷節目《如果愛》時「堅撻著」，前日Christy與張倫碩在內地為第三季《如果愛》擔任嘉賓錄影時，張倫碩竟向Christy送上求婚驚喜。
跪地送上戒指
張倫碩與舞蹈員表演完歌舞后說：「我們從《如果愛》走出來的，所以我覺得在節目結束時，都給大家一個更好的開始，全世界都看到我曾經講過我會對你（鍾麗緹）負責任，我希望可以給你快樂，和永遠的開心，希望你可以嫁給我！」
說罷張倫碩拿著戒指跪低說：「你願意嫁給我嗎？」全場人即時起鬨，在雙方父母和家人見證下，Christy開心得眼泛淚光說：「我願意！」之後張倫碩親吻Christy，有情人終成眷屬。
記者昨致電恭喜Christy，她透過微信開心地說：「當然say yes啦，因同佢一齊一年，好瞭解佢性格，佢係一個好負責任嘅男人，好take care我同小朋友，好多謝《如果愛》，我可以搵到我真愛。我最開心係everyday我可以同佢say good morning、good night。」
雖然第三度結婚，但Christy不但不會一切從簡，反而計劃大搞，她說：「我其實從來未有過好traditional嘅wedding，第一次就乜都冇安排，第二次喺加拿大，所以冇朋友，only family，同埋我從來都冇著過婚紗、好長嘅婚紗，所以今次想有個traditional嘅wedding、有個好大好大嘅party。我最開心佢一路一路寫好多歌，佢唱歌好好，我哋好開心，有好多creative嘅嘢想一齊合作，咁樣生活會好精采，喺我心裡面我知道我永遠有個男人喺身邊支持我、愛我，好難得，我覺得自己好幸福呀！
張倫碩求婚成功後當眾親吻鍾麗緹，全場賓客拍手歡呼。
鍾麗緹雖然結過兩次婚又生了三個女兒，但魅力依然，「小臘肉」張倫碩都愛上她。
（左起）鍾麗緹父母及幼女、二女，與張倫碩父母（右一、二）都戥一對準新人高興。
婚期最快10月
Christy又說張倫碩是山東人，所以結婚會做足傳統：「我一定要著旗袍，同埋要同爹哋媽咪斟茶同畀利是，係我之前未做過嘅，今次要做啦。」會否再生BB？她笑說：「呢個要順其自然啦，睇個天點安排啦。」說到婚期，Christy希望今年10月或11月舉行，但一切要視乎她拍攝電影的檔期而定。
採訪：魯吉
from:
http://hk.apple.nextmedia ... 160607/19643593
