Bella企上石壆輕鬆提腿，經過嘅少林寺師傅見到讚有學武潛質。
為咗拍新戲，Bella（右圖左）早前就跟影帝黃秋生學演戲。
超人之母羅子喬（Bella）今個月20日去咗嵩山少林寺跑馬拉松，今次五嶽超級馬拉松只係請咗佢一個女藝人去跑，由於要跑山同斜路，所以佢最後只係跑咗5K。
Bella第一次喺少林寺跑山，心情好興奮，佢跑之前做足熱身運動，拉咗個一字馬鬆嚇啲筋，Bella話：「馬拉松真係第一次跑，所以今次可以被邀請係有啲緊張，之前其實一直都有行山，仲撞過發哥㗎！亦有跑山嘅經驗，所以冇乜高山反應，都夠氣㗎！不過之前感冒咗半個月，自己擔心參加唔到，好彩好得七七八八，所以冇乜問題，條賽道都係得少量斜坡，唔係太危險。」
有潛質學武
Bella又話想留低學功夫，有少林寺師傅經過仲讚佢有潛質，因為今次少林弟子要做義工，所以冇得同佢哋一齊跑。
Bella做完東南亞超人巡迴之後，稍後會去內地巡迴，同埋準備開新戲，之前佢跟黃秋生學戲，佢話：「最近為咗之後電影做準備，所以都係以訓練為主，功夫、跳舞、日文，𠵱家喺台灣、日本時間比較多啲。」
撰文：馮仁昭
from:
http://hk.apple.nextmedia ... 160329/19547874
