林珊珊有女初長成，26歲嘅李怡，非常成熟，而且同不少圈中人熟諗，鬼妹仔性格攬頭攬頸只係尋常社交禮儀，咁究竟佢同崔建邦平安夜食雪糕玩扭蛋摸黑公園暗角熱身談心15分鐘再轉戰上飛鵝山係普通朋友定係暗交，真係好難講得埋。
但李怡嘅「戰鬥格」，就唔係秘密。佢就讀國際學校，打扮so hot，喺ig曬三點式好平常。曾經做過傳銷，最近改為sell yoga服飾。李怡最爆係2011年硬撬黃泆潼男友、廿四味成員阿肥(陳偉雄)，導致兩人四年情玩完，未幾網上仲流出李怡同阿肥嘅疑似床照……其實只係兩人赤膊上陣合照咁啦，有指林珊珊反對李怡同阿肥拍拖，最後不了了之。
估唔到真係唔知優點喺邊度嘅崔建邦，竟然成功得到李怡垂青。昨日有週刊話，崔建邦去年平安夜趁住同居女友Kelly不在港，就約李怡夜會仲上飛鵝山，咁Kelly點知呢？平安夜呢舖佢可能睇週刊先至知，但據呢個週刊引述Kelly友人消息指(頭盔嘅嘢，你懂的)，Kelly一早發現崔建邦背住佢繼續偷食，仲發現兩人互傳情慾短訊！
咁呢個同崔建邦玩情慾短訊嘅係唔係李怡？唔知。短訊有幾「慾」又睇唔到，總之「週刊引述Kelly友人消息指」Kelly係有同崔建邦吵過大鑊，男方嘅解釋係女方死纏爛打，又承諾以後唔再見佢，斷絕聯絡咁話，Kelly又信佢。
點知……其實都唔應該係「點知」，件事發展得實在太natural，唔應該用「點知」，可以用「結果」…根據報導指，崔建邦keep住同嗰個女仔繼續來往，仲唱K密會，Kelly收到風到場踢爆，崔建邦嘅解釋係:個女仔成日搵我，我都覺得唔好意思，所以先去見下佢。
真係辛苦你了崔建邦先生。
from:
http://hk.apple.nextmedia ... 160128/19469410
