走性感路線嘅𡃁模曾淑雅（Jumbo），喺舊年8月俾本報影到佢同一個斯文男去咗蘭桂坊夜蒲，雖然Jumbo喺事後否認呢個男人係新歡，仲話只係工作上嘅朋友，之不過事隔幾個月，Jumbo又俾撞見同呢個斯文男夜蒲，睇嚟唔似係工作上嘅朋友咁簡單。
前晚喺蘭桂坊，Jumbo同呢個斯文男喺夜店飲嘢，今次Jumbo亦唔係一貫性感短裙嘅戰鬥格，竟然一身密實look兼冇乜化妝，佢哋兩個好似有講唔完嘅話題，大部份時間兩個人坐埋一齊，邊斟邊飲，成個世界好似得番佢哋兩個人咁。過咗一輪先有2、3個女友人走埋去一齊玩，不過斯文男依然係全程黐住Jumbo一齊坐，冇乜點理同枱啲女性朋友，搞到其中一個女友人唔理禁煙條例，好冇癮咁喺度點煙。
之後見到佢哋成班人喺度猜枚，玩玩嚇仲見到Jumbo踎喺度揀酒，飲之前都會同斯文男研究嚇，最後大家猜到興起，Jumbo仲負責斟酒。佢哋玩到凌晨兩點幾都未有見醉，繼續飲餐飽！
【咬耳仔】
斯文男與Jumbo未見有太親暱的動作，但兩人不時咬耳仔密斟。
【開心猜】
Jumbo（右）的另外兩位女友人會合，4人玩猜枚。
【玩碰杯】
斯文男其後與Jumbo離座，兩人自斟自飲更碰杯。
頭頭碰著黑
本來諗住打畀Jumbo恭喜佢拍拖，但係佢回應話：「我𠵱家仲係單身呀，我哋唔係拍拖，只不過係咁啱有朋友喺加拿大返咗嚟，咪約埋一齊出去玩嚇。」
另外，Jumbo呢幾日都有自拍同update佢個Instagram，佢前日留言話：「2015過去啦，期待已久2016來了，上年真係好似頭頭碰著黑咁，所以最開心真係呢個犯太歲年終於快要過去，不過都仲要等埋個新年！！今年一樣簡單的希望！身體健健康康、工作順順利利，還有就是不再喝醉酒。」
採訪、攝影：楊浩賢、陳辰、羅德光
Jumbo 資料圖片
Jumbo去年8年被發現與斯文男夜蒲。資料圖片
From:
http://hk.apple.nextmedia ... 160103/19436782
