狄易達前晚係九展開騷，女友吳亞馨專程由台灣飛來香港撐場，仲有達仔一家，爸爸、媽媽、家姐同哥哥都有來睇，達仔自彈自唱冧歌《Be alright》，用普通話向女友講愛的宣言：「昨天是我們一週年，雖然很少見面，很感謝你，從來都很堅強面對思念，我好像當兵一樣，去了一個月沒回來，謝謝你對我的支持。」之後，唱到《高山低谷》嗰陣，達仔仲講到喊：「唔捨得，經理人冇放棄自己，驚自己冇得再唱歌，要拍劇拍到天昏地暗。」當時大家發現吳亞馨都喺度一齊喊。
吳亞馨聽到男友台上講嘅愛的宣言，感動到喊。
達仔倒豎蔥，後空翻，十分精采。
達仔嘅爸爸、媽媽、家姐同哥哥都有到九展支持。
否認寸陳偉霆
達仔跳足全晚，大騷舞技，砌人肉金字塔又玩倒豎蔥呀！其間佢仲同經理人簡文滌講對唔住：「對唔住，七、八年冇乜賺過錢，我唔識點做人哋好紅好爆歌手，係咪一定要返內地拍劇，係咪要全身名牌先叫做歌手，我鍾意做番自己就好開心。」
完騷後，達仔被問到指爆紅歌手係唔係寸陳偉霆，佢即刻否認話：「絕對冇，真係冇，一定冇。」講到愛的宣言，佢話：「女朋友好叻，好堅強，佢噚晚話一週年冇慶祝，驚我會分心，佢比我更堅強面對思念，搞到佢成日得番自己一個人。下年年頭可以同佢去一個旅行。」問佢會唔會打算娶吳亞馨，佢就話：「自己每次拍拖都好認真，總之𠵱家努力做嘢。」
撰文：馮仁昭
from:
http://hk.apple.nextmedia.com/entertainment/art/20151215/19411977
