告別《烏卒卒》兒歌年代，鬆鬆姐姐陳松伶近日正準備拓展她的新天地──內衣王國。由兒歌天后轉營內衣生意，鬆鬆開始重新認識乳房，一直自以為A cup身材的她，赫然發現原來自己是F cup，連跳五級！前日鬆鬆教女模特兒正確戴bra方法，傳授護胸心得，鼓勵男士為太太胸部作健康愛撫，她說：「透過健康愛撫按摩，唔單止增加情趣，而且仲畀佢知道呢個係同健康息息相關。」
撰文：魯吉
現年44歲兒歌天后陳松伶，近日投資百萬與好友鄭明明推出矯形內衣品牌內衣文化（S.BRA）。為拓展內衣王國，鬆鬆連月來積極上堂學習相關課程，重新認識乳房，並發現自己多年來一直戴錯bra。
鬆鬆不諱言昔日不懂愛錫自己的乳房，以致20多歲便開始胸部下垂。
20歲胸下垂
前日鬆鬆在尖沙嘴的新店接受本報專訪，她說：「我有腰，腳唔算肥，但硬係有啲嘢唔對勁，唔知乜嘢唔妥，有次撞到明明姐（鄭明明），佢問我係咪戴錯bra！我先知道問題所在。明明姐喺20幾歲已經開始著矯形內衣，體形係跟住矯形內衣去教育，被教育之後，體形係會改變，好似箍牙原理，經過一段時間，你成個體形會唔一樣。咁啱明明姐想發展呢個事業，所以一齊合作。我哋唔係講求細胸大胸，只講求健康同標準，有時啲人好羨慕model著衫咁好睇，其實我哋都可以，只不過以前疏忽咗管理。」
鬆鬆不諱言昔日不懂愛錫自己的乳房，以致20多歲便開始胸部下垂，蹧蹋身材，鬆鬆說：「細個學校亦冇去教，只係知開始發育，女性胴體有胸部，點去愛錫係唔知，內衣間接影響乳腺問題，因為戴得錯誤，或者唔戴，令到胸部下垂，其實胸部發育嘅時候會寒背，唔想俾人見到，又或者著咗個胸圍唔夠承托，慢慢20幾歲嘅時候就會下垂，我就屬於呢一群嘅女仔。」
Kelly為鬆鬆示範內衣，發現自己原來是34E，而非34C。
愛撫助健胸
透過課程，鬆鬆不但重新認識乳房，而且更有重大發現，就是發現自己上圍連跳5級，她笑說：「我唔知自己原來升咗cup，我一直以為自己係A cup，朋友同我講：『梗係唔係啦，你胸部乳房脂肪咁多，係B cup。』但原來我係F，跳咗5級！」
訪問當天，鬆鬆教女模特兒楊光（Kelly）正確戴bra方法，講解標準身形定義。鬆鬆表示，除透過矯形內衣補救身形外，還有個方法去愛錫自己的乳房，就是與丈夫愛撫按摩，鬆鬆說：「透過同先生互相健康愛撫按摩，一個撥胸愛撫嘅動作，唔單止增加情趣，而且仲畀佢知道呢個係同健康息息相關。」未知鬆鬆可有跟老公張鐸試過？她笑說：「暫時我學嗰套嘢時，先生唔喺香港。」
繼續唱兒歌
由兒歌轉營內衣生意，雖然看似有很大的變化，但鬆鬆認為兩者間有公通點，都是與健康掛鈎，鬆鬆說：「呢樣係不值得可恥。有部份人對呢個話題可能怕醜同敏感，但呢個係身體嘅一部份，同健康係息息相關，點解唔多關注呢？我身邊有朋友唔係子宮就係乳腺、卵巢有問題，呢啲唔應該怕羞，我呼籲大家關愛乳房。我啲fans已經變曬做媽媽，更加希望由鬆鬆姐姐講，所以完全冇衝突。」雖然鬆鬆進軍內衣生意，但她揚言不會放棄唱兒歌，她表示：「關於兒歌、養生同內在美嘅嘢，我都會繼續。」
戴Bra三貼士
陳松伶教女模特兒楊光（Kelly）戴bra正確方法，指女性最標準體形是「黃金等邊三角」，即由鎖骨中間位置到左右邊乳頭，以及兩邊乳頭中間相距都是19至21cm，三條線等邊相稱便是最完美。
1.黃金三角
鬆鬆為Kelly度胸，指鎖骨與乳頭位置多過21cm便屬下垂，兩乳頭相距多過21cm則為「八字波」，又大讚Kelly是17至18cm身材標青。
2.前傾45度
別以為鬆鬆與Kelly學米高積遜玩傾斜45度舞步，其實此舉是戴bra時要向前傾斜45度，然後才將胸圍扣扣上。
3.手撥脂肪
鬆鬆指女性乳房最多脂肪，所以戴bra後，該用手將胸部兩邊脂肪撥向前方，否則脂肪走去後方會變「副乳」，猶如多一對乳房。
from:
http://hk.apple.nextmedia ... 151018/19337456
