特區政府由鼓勵Uber變成嚴打，激起不少受過的士司機氣的港人更加力撐Uber。前組合Freeze成員甄詠珊前日剛巧被的士司機搞到一肚氣，她昨日在微博狂呻，指自己由太子乘的士去圓方，落車時要畀80元，懷疑有人兜路濫收車資。甄詠珊把與司機在車廂內的對話片段放上網，片中聽見她不停問司機：「你有冇兜路吖？有冇塞車？你講。」司機說：「我唔需要答你呢個問題，我照錶收，行邊條路要出聲㗎嘛，我係職業司機有權選擇行咩路。」甄詠珊再質問司機，對方說：「唔緊要呀，你投訴啦。」
望引入競爭
甄詠珊連發三段文狂插司機行為不當，她寫著：「非常極度超級爆嬲……我坐過無數次都係40蚊左右，但噚日我坐咗80蚊。我一直唔敢出聲，因為我驚俾人掉落車……當我落咗車，我好清楚聽到佢鬧我正龜婆，嘩，你哋話我係咪要爆？」
甄詠珊昨日在電話中餘怒未消，詳述司機的行車路線謂：「我都有揸車，正常係行花園街，兜去太子道西，再出番塘尾道一直行就係圓方。司機冇同我講係咪塞車，一嚟就已經行界限街，兜去公主道，再兜去紅磡火車站，再兜去尖東，之後再兜番去海港城，再返去佐敦先再去圓方，好明顯係兜路囉！」甄詠珊透露昨日已致電西九龍交通部報警投訴，之後會再落口供，她說：「我噚（前）晚趕時間去飲，只係抄低曬啲資料。飲完又搭的士返屋企，嗰位司機都同我講一定要報警，因為會影響同業聲譽，要畀教訓呢個人。」她直言好希望香港政府能為市民著想，引入更多競爭，她說：「小巴、巴士都有唔同公司，唔好畀的士變成獨市生意，我諗服務態度會良好啲。」
採訪：嵐山
甄詠珊被鬧「龜婆」嬲到震，昨日致電西九龍交通部投訴。微博圖片
甄詠珊與的士司機爭論，其間不停質問司機是否兜路？
from:
http://hk.apple.nextmedia ... 150907/19285095
