家燕姐願做中間人，擺和頭酒。
上週三《4個小生去旅行》記招上，謝賢（四哥）怒摑曾江轟動全城，昨晚節目首播飯局被取消，兩位主角無緣碰面。捲入風波的另外兩位小生胡楓（修哥）和Joe Junior，昨日在土瓜灣為「香港經典演唱會」綵排，兩人更唱了一首《友誼之光》贈興。而被網民升級做「Joe Senior」的Joe訪問時旋即專業地「揸咪」說：「咪就梗係我揸。」
修哥（右）扮嬲指唔識四哥曾江，身旁的Joe Junior繼續盡責揸咪。
上星期四哥掌摑曾江，是否宣傳變成羅生門。
資料圖片
修哥：唔識呢兩個人
沒有四哥的日子，修哥一臉認真說：「今日就係演唱會，如果大家想問第二樣嘢，我唔可以答大家，唔會答，過咗今日記者會後，就問乜都得。」問修哥會否邀請四哥和曾江出席，他說：「我都唔識呢兩個人，我都有硬頸㗎！」說罷便笑著轉身走，之後記者再追問他在演唱會棟篤笑部份會不會加入新題材，他即睥住記者說：「冇新嘢加，只係會有大家想聽，有趣嘅事。」
與幾位小生稔熟的薛家燕，得知掌摑一事被嚇一跳，昨日她在新城表示當晚曾聯絡修哥，她說：「佢一聽電話就話今次大件事，話佢都估唔到會搞到咁，仲話自己訪問中途已經feel到唔對路。」對於有傳小生博宣傳，家燕姐說：「我覺得係真嘅，四哥邊有必要做呢啲？」她更形容曾江鬼仔性格說：「可能佢真係唔知過咗火，真係激嬲咗四哥。」
家燕姐又說不介意做中間人：「等佢哋冷靜嚇先啦，我請大家食飯有乜所謂，呢行大家都做咗咁耐，嗌完交就冇事喇，大家都係為件事好，相信四哥提一提，阿Ken（曾江）就會留意嚇。」另外，曾經在粵語片年代跟四哥和曾江合作過的吳君麗覺得掌摑事件有博宣傳的感覺，因為她相信二人由始至終都是好朋友。
採訪：譚倩宜、馬建華
攝影：陳俊強
from:
http://hk.apple.nextmedia ... 150818/19259451
