「俾女媾」絕非型英帥靚正專利，肥嘟嘟的林盛斌（Bob）都有市場！前晚Bob與老友范振鋒夜蒲蘭桂坊，遇上「進擊的熟女」埋身。女方用33C「人間胸器」，由Bob手踭至背脊橫掃身體半個圈，之後再使出胸壓、箍頸、篤面珠、咬耳仔等招數。雖然艷福無邊，但Bob似乎吃不消，反來一招擒拿手捉住對方借勢速逃。
現年35歲的林盛斌出名腦筋轉數快，近年由主持榮升娛樂製作公司老闆，事業有成，屋企更有四條Queen坐鎮，除了老婆黃碧玲（Pearl）之外，還有三位寶貝千金，分別7歲的林霏兒、3歲林熹兒及未滿1歲的林機兒，所以Bob平時都要好努力賺錢。
前晚Bob又出動搵銀，與公司旗下藝人鄭融、邵仲衡等到W酒店出席金融啟動酒會，活動完後，便到中環蘭桂坊撐朋友的FOVEA夜店開幕，同場還有周俊偉、黃浩、薛芷倫及李雨陽與女友等。想不到，身形圓碌碌的Bob不失吸引力，一直與男人幫吹水期間，身邊突然多了一位超熟女不停扭腰跳舞，又撥弄秀髮走近，這位年齡明顯大Bob一截的超熟女，誓要惹Bob注意。
【打倒褪】
前晚「進擊的熟女」在老蘭夜場先跳住舞打倒褪，在Bob（箭嘴示）身邊擾攘吸引注意。
【胸磨臂】
見Bob未有反應，超熟女即變招，用33C「人間胸器」橫掃Bob手臂及身體半個圈。
掃股再箍頸
不過Bob不為所動，「進擊的熟女」終於按捺不住，用一招跳舞打倒褪，明明場內沒有人逼人，但她一個不經意的華麗轉身，再用33C「人間胸器」緊貼Bob手踭，「胸器」甚至橫掃Bob背部，似乎非常火辣。至於被磨的Bob竟然零反應，繼續與其他朋友傾偈，超熟女見Bob沒有「回禮」，即死纏攝位出現，主動埋身！超熟女先與Bob交談，用手掃Bob屁股，之後借勢左手箍住Bob條頸，右手篤面珠，Bob只好退後再退後。
進擊的熟女見狀即步步進逼，索性將身體傾斜，挨落Bob肥大肉厚的身軀，Bob亦禮貌地攬一攬對方，然後藉故推出。超熟女突然拖住Bob，不願放開，Bob惟有反客為主，將二人保持一定距離。超熟女在Bob耳邊講了幾句，見Bob皺眉又歪嘴，最後他說：「OK！」便甩開對方，然後速逃，他在場內逗留至凌晨一時許便離開。
【摸屁股】
超熟女突然出手摸屁股，Bob即擰頭一望。
【攬到實】
Bob與超熟女互搭曬膊頭咬耳仔。
【老婆唔嬲】
Bob早前與老婆去泰國布吉旅行，大方將老婆泳裝照貼fb公諸同好。
資料圖片
獲老婆信任
Bob似乎不擔心被老婆責罵，昨在電話中輕鬆回應：「成件事好搞笑，我都有六、七年冇去clubbing，一出去就見識好多嘢。」問超熟女埋身為何不為所動？他笑說：「我唔識佢，應該係隔籬枱老闆啲朋友，佢過嚟傾偈，話我啲節目好搞笑啫。」遭對方胸壓？他說：「佢醉咗，係好熱情，但我唔係咁有魅力，現場有好多猛男。」他表示得老婆信任，沒有被責怪，並說：「老婆睇咗段（即時）新聞，都話『進擊』改得好，佢好信任我，不嬲唔做啲古靈精怪嘢。」
採訪、攝影﹕陳辰、梁繼光、楊浩賢
from:
http://hk.apple.nextmedia ... 150816/19257515
