星二代林俊賢女兒林鈺洧（Denice）、湯鎮業孖仔湯君慈（Bruce）和湯君耀（Chris）昨日首次行貓步，現身尖沙嘴為某品牌腕錶旗艦店獻出第一次，Denice密冚34C咪咪僅騷43吋長腿，處女行騷表現淡定，還懂除外套吸睛，相反，湯鎮業孖仔就行到急急腳，十分緊張。
Denice表示家人因太忙沒有捧場，爸爸叮囑她不要緊張，最緊要平常心，之前有指林俊賢反對女兒入行，還施經濟封鎖，Denice否認：「冇乜反對，畀意見我改進，佢一直支持，經濟封鎖冇乜。」昨日周秀娜擔任剪綵嘉賓，兩個都是「好波」之人，問覺得誰身材好些？Denice賣口乖說：「我覺得佢身材好好，好fit。」擔心爸爸不喜歡性感？她說：「都唔會太性感，暫時唔會行泳衣騷，唔係爸爸唔畀，係自己唔想。」
林俊賢（小圖）女兒林鈺洧昨日首次行騷曬長腿，表現淡定。
周秀娜之前拍戲傷腳，昨日紮著傷口出席剪綵。
娜姐負傷剪綵
湯鎮業的孖仔接受訪問時很緊張：「有啲緊張，始終第一次。」他們透露爸爸有來捧場：「但怕醜匿埋，爸爸叫我哋最緊要自信。」問兩人有否興趣做戲？Bruce話：「有，但讀完書先。」之前拍戲傷腳的娜姐，左腳依然要包紮，但著5吋高踭鞋出席活動，她說：「醫生叫最好開刀做手術，但康復要半年，自己手頭多工作，可能要下年。如果半年唔做得嘢，影響都幾大。」問你要腳還是要錢？娜姐說：「人最緊要有健康，有健康才做到其他嘢，𠵱家未有時間做手術，要搵男友先，可以隨時變身，見我跌倒就扶住我，但未有男友。」
採訪：溫敏芝
攝影：陳俊強
from:
http://hk.apple.nextmedia.com/entertainment/art/20150813/19253319
