近廚得食！男神王宗堯愛就手，同過金像獎最佳女配角DaDa（陳靜）拍拖，又嗒過浸大E神楊梓瑤，甚至被指和周永恆小三Ruby（劉伊靜）曾經行得好埋，近日男神身邊女伴已換上一個長腿圈外人。上週日（七月十二日），王宗堯做司機接女友，再會合家人到銅鑼灣開飯。在人多鬧市，男神和長腿女友保持距離，但飯後送對方返回將軍澳村屋時，王宗堯一手將女友攬入懷中肉緊啜爆，飛擒大咬。
做柴可夫挾住撐「雨傘運動」的光環，今年書展推出新書《我都係香港人》的王宗堯，上週日（十二日）晚揸住部落地個多月、價值五十萬的凌志NX 300h，T恤短褲踢拖現身大坑，從一幢大廈接了個長髮長腿的女子上車，直駛往銅鑼灣。當日同行還有男神的家人，一行五人兩車，在銅鑼灣鵝頸橋泊低車後，再步行過對面的登龍街開餐；沿途大家有傾有講，女友全程刻意同王宗堯保持距離，但同男神一家，明顯熟絡。
行到去登龍街，王宗堯同女友約了另一對朋友食飯，和屋企人分開搵食。匆匆食了一個鐘，男神自動波離枱找數，臨離開前，女友再查看有沒有遺留東西，表現細心。
「之前阿Greg（王之洋名）同過圈中啲女仔拍拖，但相比之下，佢話圈外人簡單啲，加上呢個女仔性格好好，又係阿Greg鍾意嗰類（長髮、有身材），所以識咗無耐佢就發力追。」知情者說。
凌晨返到將軍澳村，四圍無人，王宗堯大街大巷，攬實女友肉緊啜。
王宗堯孖住女友到銅鑼灣食拉麵，同行還有男神的父母及兄弟。 攬住啜爆食完飯，王宗堯先陪友人到附近攞車，之後再做司機，送女友返回將軍澳村，在咪錶位兜圈搵唔到位，王宗堯將坐駕停埋一邊，再落車從車尾箱捧出一堆窗簾、咕𠱸交到女友手上。
暗黑街頭，又冇人，王宗堯一手將女友攬入懷中，肉緊地啜爆對方好一陣，才依依不捨目送女友離開。
換口味食圈外「素菜」，男神更加得心應手。
同友人晚飯期間，王宗堯不停傾電話，講多過食。
食完晚飯，王宗堯同女友刻意前後腳保持距離。
王宗堯幫女友從車尾箱取出窗簾布、咕𠱸等家居用品。
11年同DaDa拍《喜愛夜蒲》撻著，但拍拖年多，對方移情闊少分手。
去年底同周永恆小三Ruby孖咇玩煮飯仔，交情非淺。
上週五王宗堯殺入書展為讀者簽名，連民主黨區議員鄺俊宇都要同男神合照留念。
