瀡滑梯梗係要又高又斜先好玩！愉景灣嘅11米高吹氣滑梯仲要唔使消費換飛、唔使入場費，真正免費，超吸引！
來自美國嘅Slide the City八月二十二日將會喺香港舉行，貪玩一族最近聽到滑梯呢兩個字已經興奮到不得了，不過仲要等成個月，等唔切就入愉景灣啦！
愉景灣將於八月喺大白灣沙灘上搭起吹氣滑梯，有11米高、56米長，雖然規模同Slide the City無得比，不過勝在免費任玩，親自試玩過之後，非常刺激，超抵！
45度斜台 刺激有驚喜夏天熱辣辣，想去沙灘游水消暑，每逢週末一定人頭湧湧，唔想同人逼，不如搭船入去愉景灣大白灣沙灘。平時週末大白灣沙灘有好多活動，好似沙灘排球、扒艇等等，今年暑假仲有新嘢玩！喺愉景灣碼頭一落船，已經可以見到有一條吹氣滑梯喺沙灘，行近睇原來真係好高！工作人員話有成十一米高，吹氣滑梯由好多部件吹氣組裝而成，由扁塌塌到吹脹，大概需要十五分鐘。
知道有得試玩，心情特別興奮，不過當去到滑梯樓下，準備行上去之際，先發現其實好斜，有45度！喺吹氣樓梯一步一步行上去，一個不小心踏空，真係幾驚，辛辛苦苦行到上最頂，氣都未喘完，滑梯已經喺面前要瀡落去。向下一望，45度斜台加11米高，真係唔講得笑，工作人員教我要儘量躺後，可以滑得更遠，當一坐好要滑落去，速度好快，兩秒已經到地，而且因為太快，嚇到將上身坐起，根本滑唔到去最後！呢條滑梯有速度有角度，非常好玩，最重要係免費，而且8月1日至30日天天開放，放暑假去玩就啱曬喇！
吹氣滑梯整個8月都會聳立於大白灣沙灘，但為了保障安全，如遇上惡劣天氣，就會暫停開放。
要行上滑梯並不容易，一定要扶穩旁邊的扶手，而且每次只可以有一個人行上樓梯，以策安全。 愉景灣沙灘滑出Summer Fun
喺滑梯旁有好多沙灘椅及沙灘遮，免費供人使用，不過先到先得！ 日期：8月1日至30日
時間：11am-6pm
地點：愉景灣大白灣沙灘
費用：免費任玩，不設任何消費要求
入場方法：到大白灣沙灘的服務台，即場讚好「香港愉景」facebook專頁
設備：沙灘設有淋浴花灑，另備免費沙灘傘及沙灘椅供遊人使用
注︰只限身高130cm或以上。孕婦、有傷口或身體不適人士不可參與。參加者須同意遵守安全守則，及聽從現場工作人員的指示。
反鬥奇兵廿週年 開玩具派對反鬥奇兵係好多人嘅童年回憶，胡迪、巴斯光年、三眼仔原來已經陪咗我哋二十年喇！今個暑期喺屯門市廣場有反鬥奇兵嘅大型展覽，以玩具派對為主題，同fans一齊慶祝！有一眾動畫主角嘅巨型裝置，更會重現三眼仔於夾玩具機內的一幕。另外有全港首個3D體驗區，有多個互動遊戲，例如避開勞蘇的監視，由託兒所逃脫，全部都係同電影有關！同場更將展出多件反鬥奇兵珍貴收藏品，包括電影限量珍藏版菲林等等，fans一定唔可以錯過！
今次仲出售全新日本版三眼仔系列精品，fans唔使飛去日本買喇！
展覽將展出多件珍貴收藏品，包括首次在港展出的手繪。 屯門市廣場×反鬥奇兵20週年玩具派對
日期：即日至8月31日
時間：10am-10pm
地點：一樓中央廣場
