陳慧嫻登台唱正版《儍女》

陳慧嫻上週六以一身黑色潮look造型，出席澳門站「寶麗金永恆金曲演唱會」，她笑說：「今日終於輪到我演繹《儍女》，我冇特別用其他新嘅演繹方法，歌迷應該想聽我一貫唱法，話曬係寶麗金金曲，都係懷緬過去比較適合，哈哈！」

有玉女掌門人之稱的周慧敏亦首次參與演出，觀眾驚喜尖叫，她說：「之前幾場演唱會都冇參與，今次見番咁多老友感覺好親切。」周慧敏還與李克勤合唱《萬千寵愛在一身》，勾起觀眾集體回憶。同場還有湯寶如赤腳演唱，又與陳曉東拖手合唱《相思風雨中》，令觀眾拍爛手掌。

撰文：皓騫
from:http://hk.apple.nextmedia ... 150317/19078601

歌手陳慧嫻入行30年，其中一首作品《儍女》唱到街知巷聞，就連李逸朗早前翻唱呢首歌嘅哭腔亦受到關注。不過陳慧嫻情路一直都唔算順境，佢同區丁玉、醫生男友謝國麟最後都分手收場，近年有雜誌報道話佢同身邊喜歡作中性打扮嘅女助手Elson過從甚密。

【分開嚟行】

陳慧嫻同佢位喜歡作中性打扮嘅女助手Elson行到離行離列。

【除罩唞氣】

陳慧嫻喺家居店見人少少，卒之除咗口罩唞一唞氣。

【返去新居】

兩個人上咗的士之後直駛去上水新居。

戴口罩掩人耳目

日前夜晚7點幾，慧嫻同一頭短髮嘅女助手Elson齊齊喺銅鑼灣行街。將頭髮染成金色嘅慧嫻戴住口罩，行喺馬路上完全冇人認得出，佢哋一齊行街嘅時候兩人都顯得有啲避忌，當入到I.T時裝店嘅時候兩人先表現得親密，喺舖頭入面有講有笑，不時交換揀衫心得。佢哋兩個喺時裝店足足逗留咗大半個鐘先離開，雖然唔係滿載而歸，但都顯得好滿意。

之後兩人去咗日本城睇家居用品，由於夜晚時間店舖入面較少客人，環境顯得冷清，慧嫻卒之放下戒心，除去口罩，佢同Elson亦行得較埋，仲聽到佢哋討論緊想買一啲掛衫嘅掛鈎。不過當一見有人行過時，慧嫻即火速戴番口罩，又同Elson保持距離。喺日本城大約逗留咗15分鐘左右，就搭的士離開。的士過海去到上水一私人屋苑，有別於早前慧嫻嘅獨立屋寓所，相信佢哋兩個目前正為新居添置用品。

採訪、攝影：畢紹基、陳辰、朱志聰、徐錦池
from:http://hk.apple.nextmedia ... 150408/19104202