張艾嘉前日率領梁洛施(Isabella)、李心潔喺北京宣傳電影《念念》，心潔喺老公偷食一事，事隔大半年首次開腔回應，咁啱Isabella同心潔都係感情上「觸礁」，難怪被內地傳媒影到佢哋因為張艾嘉講「人係要同自己「和解」之後，先可以同人家「和解」，講調整心情都需要時間嘅歷練。」Isabella同心潔當場喊晒，未知係唔係回想起自己情路上嘅點滴，Isabella都慨嘆自己呢幾年經歷咗好多嘢。
為人所知嘅係Isabella喺21歲嗰年生咗大仔李長治，隨後一年又生咗孖仔，大家以為佢有機會嫁入豪門，不過最終都係同男友分手收場。據內地報道講，對於當年被指係想靠「三子之力」，踏入李家家門，Isabella就話擇偶要求最重要係睇個人嘅心地，唔會睇嗰個人嘅背景。
之後Isabella又指所有嘢要放下，唔好太執著嘅去諗，Isabella又覺得自己做咗人哋媽咪之後，好多想法都唔同晒。
據內地媒引述指，當時有記者問「因為李澤楷的身份，以及你和他的關係，外界一直覺得你是非常瞭解自己，知道自己所要的人，你如何評價自己」，Isabella認為其實我去認識朋友唔係睇佢嘅背景，係睇「聊不聊得來」，Isabella覺得大家都係人，最重要嘅係對方嘅心地。
早前有傳Isabella帶住囝囝喺加拿大生活，獲李家數億分手費，以及可以攞贍養子女嘅信託基金，Isabella強調自己嘅小朋友過得好普通，佢亦都喜歡平靜嘅生活，因為佢哋喺外國嘅生活過得比較自由，希望小朋友喺普通環境長大，如出外食飯、去公園玩。
from:
http://hk.apple.nextmedia ... 150306/19065080
