譚詠麟（阿倫）演唱會前晚大年初三（二十一日）唱到第九場，除咗畀機會契仔關楚耀上台唱歌，仲請咗佢班老友陳友、鍾鎮濤（阿B）、彭健新同葉智強將溫拿合體，一班人仲合唱咗《ShaLaLa》同《千載不變》。
阿倫請嚟契仔關楚耀（右）做嘉賓，唱得非常開心。
舞步似早操
溫拿上台例必放笑彈，前晚都唔例外，阿倫先要四個人用羊嘅眼耳口鼻講恭賀說話，但全部人都亂講一通，阿倫就笑住話：「其實我哋溫拿真正有讀書嘅人唔係太多。」阿倫又喺台上講笑：「阿B，好多人覺得溫拿當中，我哋成日唱曬啲歌喎！」阿B即刻話：「我哋係主唱嘛！」但阿倫前晚就話要讓曬畀健仔、陳友同阿強唱，仲叫佢哋跳埋有益身心嘅健康舞！結果三個人合唱內地大熱嘅《小蘋果》，舞步就同做早操冇分別。
另外，阿倫之前專登約埋李克勤同幾個後輩歌手Robynn& Kendy、藍奕邦、AGA（江海迦）、Alex Fung（馮翰銘）影賀年照，克勤仲祝大家：「福降羊年，大家和氣生財，財運自然滾滾來！」
撰文：馮仁昭
馮仁昭
from:
http://hk.apple.nextmedia ... 150223/19051059
