劉德華一連20場紅館演唱會，前晚第二場依然爆滿，華仔好友溫拿五虎擔任嘉賓，並乘機宣傳他們農曆年的個唱。另一特別嘉賓是劉父，他錄片段感謝fans支持華仔，又形容華仔出世時黑掹掹，絕不可愛趣致，但估不到現今卻成為萬人迷。
劉德華「Unforgettable演唱會」首場有黎明做嘉賓後，前晚第二場有五神合體的溫拿樂隊，五虎和華仔合唱《明星》，歡呼聲四起，華仔搞笑地說：「嘩，好似係你哋開演唱會咁。」
溫拿五虎不但踩場做嘉賓，還把握時機不客氣地為農曆年的演唱會大賣廣告，阿倫笑說：「希望到時我哋開演唱會，都會有今晚咁好氣氛，我哋就當預先熱身啦。」五虎再唱一首《陪着她》時，走到台前跟觀眾握手，十足自己開演唱會一樣。
華仔介紹溫拿出場時，強調自己在他們中年紀很小，他又搞笑地說：「當年我夠膽勇闖樂壇，都係因為見到阿倫同陳百祥都可以唱歌，既然佢哋都得，我深信自己只要努力，一定可以成為歌手，家終於願望成真。」
現場不但女觀眾表現瘋狂，連男fans也衝到台前要和華仔深情擁抱，令全場女fans尖叫，華仔一時興起單腳站在欄上再跟fans擁抱，表現認真肉緊。首場演出時華仔因感動喊了三次，變成大喊包，之後訪問他表示會努力忍住，但前晚再唱到《仍唱我的歌》時，他還是抵不住fans的熱情最終喊了，還搞笑地要fans不要再整喊他。
前晚嘉賓除了溫拿五虎和今次20場必定出現的葉德嫻外，劉爸爸也專程拍下片段為華仔打氣及多謝fans說：「1961年9月17號有一個BB出世，佢出世時生得黑掹掹，真係估唔到佢今日會做明星，多謝你哋。」劉爸爸一番感人的說話，惹來全場掌聲和應。
from:
http://hk.apple.nextmedia ... art_id=14795025
