老闆楊受成（左）搭住林峯膊頭密密傾，足見林峯備受重視。
林峯離開無綫，傳以一億身價簽約英皇，昨日林峯首度參與公司舉辦的陸運會，即獲厚待不用玩任何競技賽，盡顯一哥地位。老闆楊受成夫婦率領一眾旗下藝人，包括容祖兒、林峯、張敬軒、洪卓立、泳兒、湯怡等在灣仔運動場參與陸運會，早前整傷腳、又咳傷橫膈膜的祖兒負責示範競技遊戲，其他歌手則與小朋友一同參賽，惟「一哥」林峯只需在旁邊打打氣，最後由洪卓立贏得冠軍。
下月舉行的大台頒獎禮，林峯獲網開一面有份提名爭視帝，林峯昨日帶點疑惑說：「乜唔係嗰年一有劇出街就有得提名咩？我唔清楚，你哋問番TVB啦。」但林峯揚言頒獎禮當日有工作在身不會出席，問是否冇信心？他說：「冇乜，機會唔大。」因為冇約？他說：「唔關事，咁啱有工作撞期箒。」有傳阮兆祥因在棟篤笑中撐王維基被飛出《歡樂滿東華》演出，可覺大台小器？林峯說：「唔知係咪真，祥仔都好忙，可能有其他工作。」有傳林峯離巢大台成先驅分子，好兄弟吳卓羲、王祖藍亦有意走人，林峯謂：「唔關事，我之前都有好多藝人走，每個藝人決定自己嘅路，我咁啱timming係咁，要睇自己想向邊方面發展。」
容祖兒負傷上陣，示範競技項目。
洪卓立彎身孭着女友湯怡，兩人默契十足。
英皇藝人湯怡（左起）、泳兒、衛詩雅、岑紫生、冼色麗和許靖韻在競賽前做好熱身準備。
祖兒認飛甩新城
另有傳今年陳奕迅、容祖兒、李克勤等一線歌手將缺席樂壇頒獎禮，祖兒直認未能出席新城舉辦的首個樂壇頒獎禮，她解釋：「公司好鍾意我賺錢，咁啱26號要去美國做騷，1月又要去澳門，唔知會唔會又撞期。我都覺得今年氣氛唔係咁好，反而想去支持吓。」相反被指支持佔領行動的軒仔較清閒，今年聖誕難得有假放，問可會約關智斌？他說：「佢好似要喺橫店開工。」
採訪：王連連
攝影：沈健程
from:
http://hk.apple.nextmedia ... 141130/18952373
