港姐出身的袁嘉敏於新片搏到盡，為了不讓性感出浴的「警鐘胸」Jessica C.搶鏡，穿上褻衣的她向安志杰施虐，大膽程度爆燈！袁嘉敏透露因鞭子太幼難控制力度，鞭打時冇留手，令對方痛入心！她又自爆主動送「肉嘴」，嚇到怕醜仔安志杰硬曬軚！
穿上褻衣的袁嘉敏於《屍城》中有大膽演出，為成名不介意走性感路線。
袁嘉敏（Candy）近日被爆將在王晶新片「終極一露」，早前她率先試水溫，於太陽娛樂投資的電影《屍城》與安志杰、台灣女演員王子魚玩「集體遊戲」，穿上性感褻衣向安志杰施展SM誘惑，不讓另一女角JC搶盡風頭！劇情講述全城受病毒感染變喪屍，一班生還者於廢墟中生活，在無警察狀態下形成奴隸制度，更活捉生人為所欲為。
涉及私隱拒提反應
擁33D驕人上圍的Candy於片中穿上褻衣，大曬三吋事業線，又手執皮鞭虐待安志杰。雙手被綑綁於椅子上的安志杰，無力反抗任兩女魚肉。Candy除了向男方送「肉嘴」外，更坐在赤裸上身的安志杰大髀，施展渾身解數挑逗對方。安志杰獲兩女輪流「服侍」，後來更與半裸的王子魚咬耳仔，二人胸貼胸零距離接觸，意識非常大膽。
袁嘉敏指皮鞭太幼，很難控制力度。
安志杰雙手被綁於椅子上，任由袁嘉敏魚肉。
Candy接受電話訪問時大爆，為挑逗安志杰，竟大膽臨場加插激咀戲，令男方嚇窒！她說：「嗰場戲好多都係即席創作，劇本冇寫足細節，所以我錫佢都好意外，因為佢本身都唔知。（擔心對方覺得你抽水？）冇咁諗過，佢係好爽嘅大哥哥、好西化，所以我哋都覺得錫唔係咩大事，佢都明我角色係要咁做。」提到坐大髀挑逗安志杰，問對方有否生理反應？Candy只透露他有點緊張：「之前同其他男演員拍過親熱戲，我都從來冇講過，呢啲係佢哋嘅私隱，所以我都唔會講。」
袁嘉敏臨場加插咀戲，令沒有心理準備的安志杰嚇了一跳。
袁嘉敏捉著王子魚錫安志杰。
JC希望大家欣賞她身材之餘，亦要留意她的演技。
JC覺得劇情需要，不介意與同性演員拍親熱戲。
狂讚大隻有安全感
Candy坦言拍攝時非常尷尬，並自爆「兜巴星」兼狂鞭安志杰：「我真係堅打落去，足足鞭咗十次，因為條繩好幼都幾難控制，所以我都好難錫住佢嚟拍，當時仲打中佢唔舒服嘅地方。（打中佢下身？）唔係，不過我哋換角度拍咗好多次，打到佢好痛囉。」未知謝婷婷得悉舊愛安志杰被真鞭打會否感心痛呢？
至於有否過電？Candy即對拍檔讚不絕口：「覺得佢好奇妙，日日見到佢上身赤裸，身形都咁fit、咁大隻，佢係好友善、好有安全感嘅陽光男孩，相信每個女仔都鍾意呢type。」
對於片中不及王子魚性感，Candy否認錫身：「唔係，導演冇要求我咁做。（你輸蝕咗？）冇所謂啦，都係跟導演安排。」提到稍後拍攝導演王晶的三級片《鴨王》，與糖妹舊愛何浩文（Dominic）埋身肉搏，問她還想跟哪位男藝人挑戰親熱戲？曾與古天樂拍床戲的她笑謂：「古仔，因為佢經驗豐富，仲好規矩。」
戲中另一女角Jessica C.不讓Candy專美，有一場赤裸上身出浴戲。提到Candy與安志杰有大膽的SM戲份，JC只淡然表示：「唔清楚。（你啲沖涼戲都好激！）拍嘅時候都知道係劇情需要，覺得合情合理所以配合。」問到電影上映時，擔不擔心觀眾將她與Candy比較？JC經理人則表示：「電影製作班底好認真，所有劇情都合情合理，亦唔怕有比較出現，大家都唔同style，JC走性感路線，條件都唔差。」
文：影視組
from:
http://orientaldaily.on.cc/cnt/e ...1010/00282_001.html
