吳千語談及林峯時，冧爆大讚男友儍儍的兼有男人味。攝影：沈健程
青春無價，21歲的吳千語，有樣有身材，難得是有個「筍盤」男友林峯認購，千語BB將男友徹底私有化，也將他改變成浪漫一族，兩口子人前人後都甜到漏。與男友年紀相差13年，千語BB不擔心相處、不擔心催婚、亦不擔心男友太靚仔，二人的璀璨人生剛剛才開始。
撰文：溫敏芝
吳千語入行3年，幕前演出機會雖不多，但一部《男人如衣服》意外令她覓得圈中「筍盤」林峯，二人拍拖不久已周遊列國、甚至見家長，感情穩定，林峯更不時公開愛的宣言，冧爆女友，所以年紀相差13年，不是問題，反正現年34歲的林峯正正事業搏殺期，才最有男人味。
林峯跟千語BB戀情公開後，多次被影到拍拖出國旅行。資料圖片
男友變浪漫
吳千語近日與林德信（Alex）及盛君等演出電影《青春鬥》，日前三人在佐敦接受訪問，千語在戲中因暗戀大師兄徐正曦而加入武術隊，對大師兄一見鍾情，但現實中千語卻說：「我一定唔會，我覺得我見過靚嘅人太多，我入行第一部戲係同吳尊拍，佢已係神級，係男神，嘩！已經見過呢啲咁靚嘅，睇過就OK，唔會一見鍾情。」問到她現時的男友呢？千語笑說：「佢係男人味多啲，雖然都係好小朋友，但個樣man啲，我拍拖一定要對方性格好，我鍾意啲kai（儍儍的）嘅，好似Alex咁，我鍾意搞笑嘅男仔、輕鬆，唔鍾意太悶，太正經。」
林峯為了千語BB公開戀情甚至愛的宣言，愛得肉麻，男友又有否大脾氣？千語即一臉滿意地說：「冇冇冇，佢脾氣好好，好細心。」會否經常製造驚喜？她說：「一年一次都OK，不過佢呢樣嘢係改變咗，佢以前唔會做呢啲嘢，可能佢知我係鍾意surprise嘅人，我自己都會付出，會咁做，我鍾意做呢啲嘢。」吳千語每每遇上傳媒，都被問結婚計劃？她肯定的說：「我哋啱啱先開始做嘢，男仔30幾歲仲好細個，呢樣嘢要等緣份，大家都幾忙，佢有工作已經計劃咗幾年，呢個時間唔會諗呢啲。」並說男友父母沒有催婚。
千語在新戲《青春鬥》中有不少動作場面，難怪令男友擔心。劇照
在新戲《青春鬥》中，千語為了大師兄徐正曦而加入武術隊，她卻說：「我完全唔識打，拍戲都有拗親腳，拗親頸。」千語表示戲中有不少高難度戲份，幸有替身相助，她說：「有個鏡頭好危險，講隔籬隊個260磅男仔從天而降，要扮踢到個女仔，好彩搵咗替身幫我，個替身都比佢踢到暈咗，換轉係我會入醫院㖭，真係嚇咗一大驚，好敬佩佢哋。」千語坦言男友知道她拍這部戲都有少許擔心，覺得她弱質纖纖，她說：「我覺得自己雖然瘦，但唔係咁弱，不過佢都有比貼士我，叫我墊多啲喺手同腳，係好好嘅提點，因為都撻低咗好多次。」千語笑言日後演文藝片較適合自己。
戲中吳千語因暗戀大師兄徐正曦而加入武術隊。劇照
細個似黑炭
這齣是青春片，當然令千語回想起不少讀書日子，千語坦言小時很反叛，不聽話又不交功課，不過這個階段只維持了一年半，最鍾意是整蠱人，都令家人很頭痛，問到讀書時是否已很多人追？千語說：「完全冇，我細個好醜樣，嗰時我係泳隊，黑到好似嚿炭，我一向都唔係好扮靚，係入行先着裙，細個係個男仔頭。」
服裝：Twist
場地提供：佐敦新橋法燒烤場
from:
http://hk.apple.nextmedia ... 141205/18957832
