最近TVB藝人走嚇一個，走嚇又一個，首屆香港先生高鈞賢前日先執包袱，原來上週日年僅21歲、經常演學生妹同俾人強姦角色嘅石天欣又靜雞雞走人，轉簽「寸嘴Barbie」夏尉喻所屬嘅星秀堂。
噚日打電話畀天欣問點解唔同無線續約？佢話自己16歲入行，一直唔介意演乜嘢角色，但年復年咁俾人強姦，實在令佢有啲厭倦，佢話：「高鈞賢就一世做變態佬，我就連續三年俾人強姦！自從2013年拍《仁心解碼II》俾李家聲喺天台強姦多咗人識後，之後再喺《巨輪》同未播出嘅《再戰明天》我又要俾人姦，好似每年一部咁。公司畀曬啲慘情角色我做，令個人成日喺情緒低落狀態，好唔開心。」
天欣俾李家聲捉上天台強姦一幕好逼真，之後每年一部強姦戲，令天欣好厭倦。資料圖片
「唔鍾意啲態度」
不過令天欣真正離開嘅原因，係因為傾續約嗰時氣氛好唔愉快，佢話：「我覺得公司政策唔係咁好，尤其呢兩年變化好大。佢哋都有加我人工，但我唔鍾意啲態度，覺得唔簽佢哋就唔得，香港剩番一間電視台咁。」好多人話無線人工低，天欣亦好唔客氣咁話：「我相信只要我肯做，外面是但搵份工都可以搵得番呢個人工，我一直都好慳。」
撰文：馮仁昭
From:
http://hk.apple.nextmedia.com/entertainment/art/20140912/18863026
