女星周麗淇（Niki）與男友徐正曦昨晚同場出席活動，人前Niki扮當男友透明，但其實兩人恩愛爆燈，徐正曦直言會加油迎娶Niki，氹得Niki冧笑；更被取笑祝捷會預演結婚。
周麗淇與徐正曦在慶功宴上，甜蜜合照。
周麗淇與男友徐正曦、導演劉家豪及監製梅小青等昨晚出席nowtv劇集《衛子夫》祝捷會，因此劇是Niki與男友「定情劇」，情侶同場自然成為焦點！遲到的Niki到場後只顧與內地男星沈泰傾偈，與徐正曦相隔四、五個身位，完全當男友透明，被冷落的徐正曦無奈對住記者傻笑。上台後，Niki跟身旁的柳影虹密密斟，又撩記者傾偈，無視正在發言的男友。其後記者要求兩人合照，Niki起初耍手擰頭，最終「被迫」合照。
會遷就女友
受訪時徐正曦表示不會跟Niki鬧交：「平時係我遷就佢多啲，佢都有就我，佢工作忙冇時間食飯，我都會發脾氣，不過忙就冇辦法。」問到何時養起女友？他說：「隨時都可以！」又突然擘大口說加油，相當搞笑！問到Niki是否其結婚對象？他說：「一定！（幾時？）加油！好快！（求婚？）加油。（有冇諗過？）我哋係有計劃嘅人，大家有共識，往後方向係一齊。」
中港兩邊走
其後Niki被取笑是預演結婚，她即說：「唔係！係慶功，好開心套劇成績咁好。（搬返大陸住？）唔會！兩邊走。」提到男友表示會養她，Niki甜笑說：「佢講就得啦！咁咪啱囉！大家努力，我唔係等人養嘅女仔，我搵錢自己使，佢搵錢養我，我咪收兩份！（同場尷尬？）冇呀！我哋日日都傾，唔使喺度傾。」此外，Niki及黃芷晴昨出席「daisy balloon個人藝術展＠海港城」活動，剛過生日的Niki表示男友送了驚喜禮物及鮮花。
右起：柳影虹、周麗淇、梅小青、劉家豪、徐正曦與沈泰互相祝酒。
憑《衛子夫》在內地人氣急升，周麗淇開心攬監製梅小青。
文：影視組
From:
http://orientaldaily.on.c ... /00282_050.html
