今年推出處女個人寫真的「藍莓」劉俐乘強勢進軍飲食界吸金，多年來慳埋慳埋與友人合資逾七位數搞點心餐廳。日前藍莓到觀塘新舖視察裝修進度，心急睇新舖的她竟玩跨欄走出馬路，極速行入舖頭，更貫徹「慳妹」性格只食30蚊茶餐醫肚。
劉俐擘開42吋長腿，輕易跨過路邊鐵欄。
天使「藍莓」劉俐去年約滿無線後，回覆自由身向多方面發展吸金，早前她推出個人寫真「big」入書展爭做寫真女王，成功俘虜一班宅男的她最近又有新搞作，將入行多年慳埋的積蓄與兩位圈外友人合資逾七位數搞點心餐廳，升呢做老闆娘。
首次做老闆娘的「慳妹」藍莓相當著緊，日前獨自到觀塘宜安街的舖位視察裝修進度，當日她先醫肚在多間茶餐廳門外格價，最後被抵食的30蚊茶餐吸引幫襯，藍莓邊食邊按手機，不消一會已食飽離開。心急睇舖的她竟學劉翔玩跨欄，伸出42吋長腿跨過街邊的鐵欄走出馬路，趁冇車即大步行過對面街走向舖頭。藍莓走進巷內一間裝修中的舖頭巡視，並與裝修工人研究進度，逗留十分鐘即安心離開。藍莓心急巡舖搞到大汗疊細汗，其後箭步走入雜貨店內買飲品解渴。
慳妹劉俐點了30蚊茶餐醫肚。
劉俐親自落舖頭視察裝修進度。
熱得香汗淋漓的劉俐買飲品解渴。
一腳踢送外賣
藍莓昨日於電話中自爆家人也有出錢讓她過老闆娘癮：「我同兩位朋友合資咗七位數，我同屋企人就夾六數位投資，遲啲回本一定會還畀屋企人。間舖除咗有傳統中式點心，仲諗住玩破格，食點心唔一定配茶，仲可以配紅酒白酒，同埋會專做送湯嘅生意，飲家常靚湯好緊要。」問會否自己做生招牌？她笑說：「冇諗過喎，不過開張一定會隆重其事，我會幫嚇手！做生意要親力親為，一腳踢都冇問題，睇數同Marketing嘅嘢都要顧。」
文、攝︰專案組
From:
http://orientaldaily.on.c ... /00282_012.html
