劉俐（藍莓）有天使面孔、魔鬼身材，可惜入行四年依然星途平平，一直靜待一個上位機會。今年劉俐終於跟無綫這個大碼頭結束經理人合約，自由身的她望可轉型闖大銀幕，更揚言不怕演要化醜樣妝的角色，不過她堅持三點不露。
劉俐經常要做小三角色，所以她不想被定型。
聽到劉俐這名字，大家可能未必知她是誰，但說到其花名藍莓，相信多數人會「哦」一聲，記得這位靚女是誰。不過，劉俐給人的印象，都是演一些姣溝某某或送波餅等的角色，其實她本人也想有所改變，今年她就與無綫結束經理人合約，盼有新嘗試。
不甘做狐狸精
談到自己似被定型，劉俐也甚失落：「入行四年，我一直好想試多啲唔同嘅嘢，但無綫畀我嘅機會唔多，好似限定咗我係做情婦、勾引人甚至只會發姣嘅角色。我啲粉絲都好戥我唔抵，其實除咗女性化一面，我仲可以有好多唔同嘗試，我唔係只識做狐狸精。」
劉俐堅持不會為藝術犧牲露三點。穿恤衫、西褲的劉俐流露出一份硬朗感。
今次約劉俐訪問兼拍照，她充分表現出各種可塑性，穿起比堅尼時可大騷長腿，誘人身材連同性都羨慕不已，但穿起恤衫、西褲，卻又能流露出一份硬朗感，令人想起Maggie Q及安祖蓮娜祖莉（Angelina Jolie）等女星，性感而又富殺傷力。劉俐表示：「希望向大銀幕發展，就算要我演粗獷、男性化啲，甚至要化醜樣妝嘅角色我都可以，希望令大家對我改觀，亦想有屬於自己嘅代表作。」
好嘢留畀老公
不過，劉俐會誓死捍衞三點，也不會為藝術犧牲：「就算畀湯唯喺《色，戒》個角色我演，我都唔想，始終三點不露係我底線，我希望將最重要嘅嘢留畀將來老公，唔想全世界睇過。」劉俐絕對是表裏不一，即使外表有多開放，骨子裏卻是個保守的人。
from:
http://orientaldaily.on.c ... /00282_044.html
