阿夢（岑寶兒）上月19號低調嫁咗畀圈外男朋友莫如迪（Dickson），仲喺尖沙嘴假日酒店擺咗十圍，淨係請咗《怪談》拍檔梁思浩，所以有好多人都唔知阿夢結咗婚。偏偏就喺阿夢出嫁第二日就有人報料，話佢老公係花花公子，空心老倌，仲虛有其表。
阿夢：係玩得好癲
噚日又有人報料繼續數臭阿夢老公Dickson，仲提供咗一啲旅行照，相入面Dickson同一班男性友人醉到面紅紅，成班除曬衫攬埋一堆，仲圍攻男友人下體，之後佢啲朋友仲喺街除褲小便，打出個八月十五同埋重要部位，認真失禮。馮仁昭噚日打畀新婚阿夢，佢笑住咁話：「係咩？我老公其實識好多朋友，佢去過外國留學，嗰班我知係邊啲朋友，係幾玩得，我覺得冇問題，係玩得好癲，佢哋都係同普通人一樣。」
Dickson（中）同一班男性朋友去旅行，玩到興起，互篤下體。
至於講到老公Dickson被指係花花公子同空心老倌，做咗人老婆嘅阿夢表現寬宏大量話：「人人都有過去，人哋都話我點點點，我自己都有拍拖，佢有唔奇，我都知佢好多嘢，我哋其實識咗十幾年，係今年頭先喺埋一齊，我覺得佢越來越好。」
阿夢同老公Dickson年頭拍拖，唔夠半年就結婚，被問到係唔係奉子成婚，退出返屋企相夫教子？阿夢話：「冇，有啱節目都會做，生小朋友我都想盡快，隨緣喇！」
from:
http://hk.apple.nextmedia ... 140604/18743518
