傅嘉莉與王浩信似是大纜都扯唔埋的兩個人，一個已為人夫、爸爸，一個是現今炙手可熱的女模特兒兼電視藝人，不過二人在早前播畢的無線劇《愛我請留言》中就上演內地新移民情陷白馬王子的好戲，劇中演醜小鴨角色的傅嘉莉更有突破表現！
傅嘉莉肯放下身段演醜角，獲王浩信讚專業。
傅：傅嘉莉
王：王浩信
為演好角色，傅嘉莉事前作了不少準備。
王浩信和傅嘉莉同樣對一場同車戲印象深刻。
無意醜化他人
傅：其實一直知你係邊個，演呢套劇係我哋第一次合作拍劇，記得喺舊年嘅無線節目巡禮裡面就要蹺住你出場。
傅嘉莉以誇張手法演出。
太太陳自瑤誕下女兒後，令王浩信工作更有衝勁。
王：哈哈！當時有少少尷尬，畢竟未合作過，不過大家都係演員，明嘅！
傅：今次嘅角色對我嚟講，真係一個挑戰，講我係一個喺內地嚟香港嘅女仔，喺劇中化濃妝、著衫娘爆，仲要講唔鹹唔淡嘅廣東話，有時候又要講好純正嘅普通話。我仲特登請一位普通話老師教我，然後又再請佢用廣東話講番我啲對白，咁我先知點講唔鹹唔淡嘅廣東話。
王：今次你演呢個角色真係豁出去，初頭我都被你個妝嚇親！不過你咁演，唔怕被人圍剿呀？
白馬王子操弗
傅：怕o架！拍嗰時將啲相放上網，就已經有人話「我哋已經唔係咁著衫o架喇！你唔好醜化我哋內地人！」其實我唔在乎我嘅角色係醜角定係靚女，我只想盡力演好，但我好擔心大家會放錯焦點，我唔係有心要去醜化其他人。
王：我就好少少，今次演迷倒所有女仔嘅白馬王子，高大、靚仔、有錢、專一！拍之前我自己喺度諗，點樣先可以型啲，於是我就「蠟」行曬個頭，著好緊身嘅衫，加上嗰排操得弗，視覺效果自然更好。
靚女放下身段
傅：你個形象完全令我好容易投入。劇裡面你叫Edward，你係我夢中情人，所有女生眼中嘅白馬王子，個個都希望自己成為你嘅下一任女友，所謂「The next station is Prince Edward」嘛！不過可惜啦，你喜歡嘅係另一個。
王：你都令我好投入角色，見到你個妝真係成個醒曬！不過我好佩服你，一個靚女肯放下身段演呢個角色。
傅：其實係現實生活中，我都係同劇中角色一樣冇乜自信，當然角色係一個悲劇人物，但我細個嘅時候，覺得自己做乜都唔及阿哥，就算我讀書叻都好，爸爸媽媽都只會話：「你叻有乜用？阿哥叻就有用！」
車廂戲最難忘
王：我嘅角色係萬人迷、超自信，但現實嘅我唔係，我細個嘅時候唔識表達自己，成日匿埋畫畫，將所有情感喺幅畫度表達出嚟，又成日被屋企人鬧，好冇自信，係一個宅男。
傅：同你最難忘嘅一場戲，我覺得係喺車入面個場，嗰時我哋啱啱先合作，場戲就只有我哋兩個喺車度，你眼望我眼。我拍劇經驗唔多，你就幫我問曬應該要問嘅問題，嗌開機、停機都係你負責。你當時個外形真係令我入曬戲！
王：要講最難忘嗰場戲，就一定係你講嗰場，當時你個妝濃到呢，個頭又有大大朵菊花，成個腮紅到不得了！
傅：哈哈，我都覺得自己好樣衰！
同為工作狂衝
傅：同你拍完套劇，覺得你好識照顧人，好肯教人，而且你畀我感覺，係你好歡迎我嚟請教你，又會處理埋好多細節，好細心！
王：你嘅工作態度令我覺得你好認真，對自己好有要求，又肯放下身段豁出去演醜角，好欣賞你夠淡定。
分配時間陪女
王：依家有自己家庭，更令我想喺工作上向前衝，老婆會比較多時間放喺屋企，就令我更加放心。不過，我都有好好分配時間陪個女，例如我返到屋企，佢揀我而唔係揀工人姐姐，就係最好回報。
傅：有時候都幾羨慕你有個家庭，尤其喺夜闌人靜時，身邊又有好多朋友結曬婚。不過依家都係工作為上，做人最緊要開心，至於我會唔會閃婚？隨緣啦，愛情要嚟嘅時候係避都避唔到！
後記：愛我請留言
傅嘉莉與王浩信對《愛我請留言》讚不絕口，王浩信提到劇中的含意：「依家資訊科技發達，人與人之間交流，好多都係靠網路傳遞。人嘅關係好似變得愈來愈疏離，所以如果愛一個人，希望你『愛我請留言』啦，當然，唔止要留言咁簡單！」
傅嘉莉服裝：Marimekko
From:
http://orientaldaily.on.c ... /00282_065.html
